Gaidūt grupys „Dabasu Durovys” desmitgadi, klauseituoji teik īpazeistynuoti ar dzīsmi nu tūpūšuo albuma. Dzīsme „Pādys” simboliski atkluoj i raksturoj ari gaidomuo albuma vadmotivu – runojūšu klusumu.

Jaunuo dzīsme ir grupys dalinīku Arņa Slobožanina i Egila Kulmaņa kūpdorbs, kurys aranžejā pīsadaleja ari puorejī grupys muziki. Dzīsmis vuordu autors Arņs soka: „Pādi īmeiti i klusej, nu tymā pošā laikā pasoka tik daudz.”

„Dabasu Durovys” klauseituojim viestej par tū, kai piec cylvāka padareitim dorbim, leidzeigi kai piec īmeitim pādim, var pasasceit, kū jis gribiejs sovā dzeivē i iz kū tīcīs. Tys ir stuosts par cylvākim, par sapratni bez vuordim i par kūpeigim celim, tai par jaunuokū dzīsmi stuosta grupa.

Itūšaļt grupa struodoj pi jaunuo albuma, kuru klauseituoju viertiejumam planavoj nūdūt nuokušajā godā, svietejūt sovu 10. jubileju. Itys byus jau caturtais „Dabasu Durovu” albums.

Īrokstā pīsadaleja: Egils Kulmanis (bolss, tausteni) Romāns Sladzis (gitara), Valdis Rundzāns (bass), Aleksandrs Tamans (bungys), Arņs Slobožanins (gitara, bolss).

Dzīsmis īroksts taps Daugovpilī, Custom Rd, studejā. Skaņu inženers James Botterill, Arns Slobožanins. Miksēja – Armands Treilihs.

Karteņa: “Dabasu Durovu” publicitatis foto