Da 31. decembra Daugovpiļs Kulturys piļs 1. stuovā apsaverama fotostudejis “Ezerzeme-F” jubileja lobuokūs dorbu izstuode.

Fotostudeja apvīnoj cylvākus, kas nav vīnaldzeigi pret fotografeju: i profesionalus fotografus, i amatīrus.

“Ezerzeme-F” pamatmierkis ir atteisteit i popularizēt fotografeju kai muokslys veidu. Fotostudeja organizej rodūšus seminarus ar zynomim fotomuokslinīkim, sasatikšonys ar školānim, plenerus i konkursus, tematiskuos i personaluos fotoizstuodis. Vairuokys reizis godā nūteik fotostudejis kūpsapuļcis, kurymuos tuos bīdri i gosti apsprīž vītiejuos i globaluos foto nūtikšonys i problemys, paruoda kolegim sovus dorbus, kūpā atlosa fotografejis izstuodem.

Fotostudeja “Ezerzeme” tyka nūdybynuota 1980. godā Daugovpilī kai breivpruoteiga rodūša apvīneiba. Pyrmuo fotomuokslys izstuode nūtyka 1984. godā. 1987. godā kolektivs sajēme gūda titulu “Tautas fotostudija”. Itymā periodā kolektivs Teodora Rudāna vadeibā aktivai pīsadaleja vysuos “Fotovasarās”, tyka organizātys daudzys rodūšuos sasatikšonys, nūtyka fotoizstuodis kai Latvejā, tai ari aiz rūbežu. 2010. godā fotostudeja tyka puorregistrāta kai bīdreiba ar nūsaukumu Tautys fotostudeja “Ezerzeme-F”, mainejuos ari vadeiba. Pasasokūt paleidzeibai nu Daugovpiļs piļsātys dūmis, fotostudejis darbeiba aktiviziejuos, eipaši fotoizstuožu organizacejis jūmā.