Aicynoj dasaceit cylvākus Latgolys Goda bolvai
2016. goda 30. janvarī Preiļu nūvoda kulturys centrā (Raiņa bulvarī 28) nūtiks ūtrei Latgolys Goda bolvys padūšonys ceremoneja, kuru organizej bīdreiba “Asmu Latgalīts”. Pasuokuma mierkis ir apbolvuot lobuokūs Latgolys dzeivuotuojus, kurī ar sovu reiceibu sekmej Latgolys regiona izaugsmi i kolpoj par pīmāru puorejim.
Da 6. decembra teik pījimti dasacejumi nu vysu Latgolys molu 7 nominacejuos – Latgolys goda lobuokais lauksaiminīks, Latgolys goda aktivuokais jaunīts, Latgolys goda saime, Latgolys goda varūņs, Latgolys goda uzjiemiejs, Latgolys goda aktivuokais seniors i Latgolys goda sirds cylvāks. Dasacejumus viertēs komiseja, kas sastuov nu Latgolā zynomu personu.
Vaira informacejis par bolvu var sajimt, zvonūt 20231327 voi rokstūt asmulatgalits@gmail.com.
