5. decembrī 18.00 pādejū reizi iz Daugovpiļs teatra skotuvis tiks spālāta izruode “Dabaseibys pūddarneica jeb Viņa debešķības Laimesciema podniekdarbnīca” (režisors Jurs Jonelis). Itei izruode atspīgeļoj meilys treisstyurī īsaisteitūs varūņu sarežgeituos jiutys. Nu stuostu iz skotuvis kai tikū radzams pavedīņs caurvyn alegoreja. Taipat kai pūdnīks ir nūteiciejs par muola pykys nuokūtni, taipat ari cylvāka liktiņs ir juo poša rūkuos.

Daugovpiļs teatra izruodi “Dabaseibys pūddarneica” ir ruodejuse ari Latvejis Televizeja, kab tei byutu daeimama ari aiz teatra sīnu. Partū Daugovpiļs teatris drūsai soka, ka, koč i izruode “Dabaseibys pūddarneica” teik spālāta latgaliski, tei ir īinteresiejuse na tik latgalīšus. Sovukuort gazetys “Diena” žurnalists, teatra kritiks Atis Rozentāls ituos izruodis recenzejā atzeimiejs: “Atslāga vuordi, kas Daugovpiļs teatra īstudiejumu padora pīviļceigu, ir vīnkuoršeiba i sirsneiba. Akteri varūņus cīši mīļoj, i taišni tys jim ļaun kai iz vyrpys nu muola izvyrpuot izruodi – na Meisenis porcelana smolkumā, nu Latgolys muola syltajā muojeigumā.”

Akteru mīlesteiba pret sovim varūnim radzama na tik iz skotuvis, nu ari tymā, kai jī doluos sovuos puordūmuos par itū izruodi. Kristīne Veinšteina (Domce): “Izruode “Dabaseibys pūudarneica” ir slavynuojums Latgolā asūšajam cylvāku i tradiceju syltumam, latgalīšu volūdai i mīlesteibai. Domce, Broņuss i Juziks tveic ituos ciļvieceibys i mīlesteibys, i tymā pošā laikā tū īmīsoj. Jī ceinejās par sovu vītu zem lelajim Latgolys dabasim i ūtra cylvāka sirds styureitī, dzeivi pīleidzynuodami muola traukim, kas sovā byuteibā ir cīši dažaidi – vīnaidu nav! Spielejūt izruodi pādejū reizi, tu atmiņu kuldā nūvītoj tuos sajiutys, emocejis i puordzeivuojumus, kas ļuove radeit tālu i izruodi kūpumā, atbreivojūt vītu jaunim tālim i izruodem, kam “Dabaseibys pūddarneicas” pīredze ir i byus cīši vajadzeiga!” Sovukuort Māris Korsiets (Broņuss) atsaziņs: “Pasasokūt itai lūmai, asmu spieceiguok apsazynuojs, ka par mīlesteibu ir juosaceinej.”

Karteņa: Džeina Saulīte