27. novembrī Rēzeknis Augstškolā nūtyka konkursa “Muna sāta, škola, pogosts/piļsāta 1917. – 2015. godi” nūslāguma pasuokums i dalinīku apbolvuošona. Školānim individuali voi grupuos beja juoizveidoj avīze, kas atkluoj kaidu da šam moz pieteitu voi nazynomu stuostu par kaidu personeibu, nūtikšonu, 1917. goda situacejis ītekmi i izmainis 100 godu ilgā pūsmā. Tyka īsyuteitys 15 avīzis, kas tyka vārtātys divejuos vacumgrupuos: 8.–10. klase i 11.–12. klase. Pasuokuma laikā apmaklātuojim beja vareiba na viņ apsavērt školānu sagataveituos avīzis, nu ari īsavērt Luisa Kerola gruomotā “Alise Breinumu zemē”, kas tyka prezentāta pasuokuma pyrmajā daļā.

1. vītu konkursā 8.–10. klašu grupā sajēme Ilgmārs Rubīns nu Preiļu Vaļsts gimnazejis (konsultants Vadims Maksimovs, RA viesturis programys absolvents, Preiļu Viesturis i lītiškuos muokslys muzeja specialists) ar avīzi “Peļieču Gaisma”. Ilgmārs i juo konsultants sajēme ari Eiroparlamenta deputatis I. Vaideris specialū bolvu – braucīni iz Briseli.

2. vītu itamā grupā sajēme Uobeļu pamatškolys mārgys Paula Vasiļjeva i Samanta Vinciune ar avīzi “Gaisma”. Juos konsultēja Uobeļu pogosta nūvodpietnīks Arnolds Jakubovskis.

3. vītu gūdam izceineja Sidnija Kalvāne nu Austrumlatvejis Tehnologeju vydsškolys, kurei ar školuotuojis Marutys Krustānis atbolstu radeja avīzi “Spogulis” par Gaigalovys pamatškolu.

Atzineibu i vareibu pavadeit vīnu dīnu kūpā ar muziki Eriku Zepu sajēme Lovisa Kerubine nu Daugovpiļs 12. vydsškolys, kurei ar tāva Andra paleidzeibu izveiduoja avīzi par sovu sātu “Drošvarim”, sovukuort Mateisam Sondoram nu Gaļānu pamatškolys, kurs kūpā ar konsultantem – školuotuoju Ritu Upenīci i nūvodpietneicu Ilonu Sondori – beja izveiduojs avīzi “Sondoru dzimta”, byus vareiba pavadeit laiku kūpā ar muziki Sovvaļnīku.

11.–12. klašu grupā 1. vītu gūdam izceineja Maltys Bārnu i jaunīšu centra komanda: Leiga Runčis, Sintija Bundere, Vita Tarasika, Lileja Orlova, Una Kancāne, Daira Aleksandroviča i Evija Laizāne. Kūpeigim spākim ar konsultantem Skaidreiti Svikšu, Viju Danilovu i Intu Buli tyka izveiduota avīze “Dzirkstelīte”. Sintija Bundere kūpā ar konsultanti S. Svikšu brauks ceļuojumā iz Briseli, sovukuort puorejī komandys bīdri vīnu dīnu pavadeis Eiropys Parlamenta deputatis Inesis Vaideris birojā Reigā.

11.–12. klašu grupā Elvita Kotāne i Linda Bumbiša (avīze “Dzīpars”) nu Nautrānu vydsškolys sajēme 2. vītu, sovukuort 3. vītā īsarynduoja Ludzys piļsātys gimnazejis audziekni Dana Butrima, Sintija Bokiša, Santa Bule, Valereja Borhova, Māris Lapšovs, Roberts Pozņaks, Alise Fjodorova, Ilze Ostrovska i Evija Lisovska. Konsultejūtīs ar školuotuojom Intu Žeikari i Leigu Arcihoviču, tyka izveiduota avīze “Ludza Senāk un Tagad”.

Avīzis “Bārzsolys” autori Kristīne Laizāne i Armands Ivulāns sajēme vareibu pavadeit vīnu dīnu ar grupys  “Dabasu Durovys” solistu Arni Slobožaninu.

Ūtrūs vītu sajiemieji, pasasokūt J. Viļuma finansialam atbolstam, brauks iz Latvejis Republikys Saeimu, sovukuort 3. vītys sajiemieji – ar dzejneicu Annu Rancāni ceļuos pa Latgolu.

Te juodasoka, ka, koč i na vysi konkursa dalinīki tyka laureatu gūdā, tok bez bolvu napalyka nivīns.

Rēzeknis Augstškola konkursu organizēja sadarbeibā ar Rēzeknis Latgalīšu kulturys bīdreibu, finansiali tū atbaļsteja Kulturys ministreja.

Roksta autore: Ligeja Purinaša, RA akademiskuos bakalaura studeju programys “Filoloģija” 2. kursa studente

Foto: nu Rēzeknis Augstškolys arhiva