Byus apsaverama Rēzeknis skaņu vizualizaceja
8. decembrī 16.00 projekta “Rēzeknes skaņas” nūslāgumā Latvejis Muokslys akademejis Latgolys filialē (Bazneicys īlā 34a, 2. stuova izstuožu vestibilā) tiks atkluota izstuode “Rēzeknes skaņas”, kurymā apsaverami vysaidi Rēzeknis ornamenti, atsasaucūt iz piļsātvidē īraksteitom skaņom. Dorbi veidoj sovpateigu piļsātys skaņu kodu vizualizaceju sītspīdē.
Projekta “Rēzeknes skaņas” autore ir Gundega Strautmane, kurei ar diktofona paleidzeibu ir īrakstejuse piļsātā saklauseitys skanis i izmontuojuse skaņu celeņa diagramu, kab tū iznastu iz bolta papeira lūksnis ar sītspīdis tehnikys paleidzeibu.
Īdvasmu itaidam nūformiejumam muokslineica smāluse, pietejūt japāņu sorkonuos tušys kaligrafu veikumu. Skaņu celeņš ir drukavuots dubultai, tys apsaverams i gaismā, i ari, pasasokūt fosforizejūšys drukys paleidzeibai, tymsā.
Sītspīdis tehnika limitātā daudzumā ļaun sagataveituos diagramys drukavuot ari iz cytim piļsātai nūzeimeigim tekstila materialim.
Gundega Strautmane ir studējuse Berlinis Muokslys universitatē Eksperimentaluo tekstila dizaina institutā, Latvejis Muokslys akademejis tekstila muokslys nūdaļā i Reigys Tehniskajā universitatē vuicejusēs tekstila tehnologejis. Juos rodūšū darbeibu caurvyn muokslinīka, dizainera i eksperimentātuoja gors. Itūšaļt Gundega struodoj kai lektore Latvejis Muokslys akademejis tekstila nūdaļā Rēzeknē.
Sovūs studeju godūs ir pīsadalejuse eksperimentaluo dizaina projektūs, kas radeiti, sasadorbojūt Berlinis Muokslys universitatei i industrialajā tekstilā zynomajam Šveicis zeimūlam Creation Baumann, kai ari Merck pigmentu ražūtnei Vuocejā.
Sovūs muokslys projektūs Gundega Strautmane daudz eksperimentējuse ar braila rokstu, kab radeitu muokslys i dizaina dorbus, kas ir uztverami i redzeigajim, i naredzeigajim. Storp reljefa punktim ar smolka pavedīņa paleidzeibu jei konstruej jaunu nūzeimi i veidoj tekstila kompozicejis, kas reizē ir ari teksts: ornaments kai kodātys informacejis nesiejs.
Izstuode apsaverama da 14. decembra.
Projekts “Rēzeknes skaņas” ir eistynuots Mozūs kulturys i turisma projektu konkursa ītvorūs, kū finansiali atbolsta Rēzeknis piļsātys dūme i organizej pošvaļdeibys agentura “Rēzeknes Kultūras un Tūrisma centrs”.
