Nu 16. decembra Latgolys muokslys i omotnīceibys centrā byus apsaverama Eleonorys Pastaris porcelana keramikys izstuode “Vakara meditācijas”.

Muokslineica Eleonora Pastare ir Daugovpilī dzymuse leivuonīte, kurai 2015. gods aizritiejs “100” zeimē, summejūt dzeivis i rodūšuo dorba jubilejus. Eleonora dzymuse 1954. godā, 1974. godā absolvēja Rēzeknis Lītiškuos muokslys vydsškolys Keramikys nūdaļu i 2007. godā Daugovpiļs Universitatē sajēme magistra gradu muokslā. Nu 1977. goda muokslineica pīsadola izstuodēs i cytūs muokslys projektūs Latvejā i uorvaļstīs. Eleonorai Pastarei ir lela pīredze pedagogiskajā dorbā: vaira kai divdesmit godu muokslineica “īsapazeist ar keramikys pasauli” kūpā ar bārnim.

Koč i porcelanam Eleonora Pastare pīsavārsuse saleidzynūši naseņ, pyrma tuo aizrauteigi struodojūt ar muolu, šamotu i cytim keramikys materialim, taišni muokslineicys radeitī porcelana dorbi paruoda sīviškeiguma i spāka manifestaceju keramikys muokslā. Meditativs spāks i piļneiga materiala kontrole ir tys, kas vajadzeigs, kab savaļdeitu sarežgeituokū keramikys materialu i laistu pasaulī trauslus, gaiseigus i apburūšus porcelana dorbus.

Karteņa: arterritory.com