Suokusēs pretendentu dasaceišona Latgalīšu kulturys goda bolvai „Boņuks 2015” par sasnāgumim i padareitū latgalīšu kultūrā 2015. godā. Bolvu sajiemieji tiks nūskaidruoti svineigā ceremonejā 2016. goda 28. februarī, pasnādzūt tuos jau ostoitū reizi. „Boņuks” ir vīneiguo bolva, kas eipaši izceļ i gūdynoj sasnāgumus latgalīšu kulturys dzeivē.

Kasgods Latgalīšu kulturys goda bolvys padūšonys ceremonejā sasateik aktivuokī ļauds, kurūs darbeibys, dzeivis aicynuojuma i rūseišonuos laiks ir latgalīšu kultura voi ar tū saisteituos nūzaris. Kotru godu bolvu padūšonys ceremoneja teik kuplynuota ar latgaliskim muzykalim prīšknasumim voi pārnejuo goda spylgtuokajim izvadumim. 2016. goda 28. februārī ceremonejis pyrmajā daļā byus vareibā ūtrū reizi pīdzeivuot festivalā „ORGANismi” topušū muzykalū izvadumu „Saule. Bērni. Rainis”, bet ūtrajā daļā byus svineiga bolvu padūšona. Iz apbolvuošonys ceremoneju kluotīnē ir gaideits kotrys interesents.

Latgalīšu kulturys goda bolvys „Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kultūrā pārnejuo goda grīzumā. Bolvys aizsuocieji 2008. godā beja bīdreibys „Kukuži” i „Latgolys Producentu Grupa”, bet 2013. godā bolvys organiziešonu puorjieme Latgolys viestnīceiba GORS. 2015. goda bolvai pretendentu dasacejumi teik padūti 19 nominacejis, kas atsatīc iz sabīdryskūs aktivitāšu, muzykys i literaturys laukim.

Aizpiļdeitys dasacejuma anketys bolvai „Boņuks 2015” elektroniskā formatā, pa postu voi aizpiļdeitys tīšsaistis dasacejuma veidā Latgolys viestnīceiba GORS gaideis da 2016. goda 11. janvara. Dasacejumus izvērtēs kompetenta žureja sovu sferu profesionaļu sastuovā.

Pārn bolvys par padareitū, sasnāgumim voi aktivitati latgalīšu kulturā 2014. godā sajieme rakstneica Inga Ābele par romanu „Klūgu mūks”, dzīsminīks Kārlis Kazāks, muokslinīks Osvalds Zvejsalnieks, literāte Ilze Sperga, Viestura Kairiša dokumentaluo kina „Pelikāns tuksnesī”, komponists Rihards Dubra, grupys „Bez PVN”, „Dabasu Durobys”, „Laimas Muzykanti”, „Elektrofolk” i cyti, bet bolva par myuža īguļdejumu latgalīšu kulturā tyka pasnāgta žurnālistei Marutai Latkovskai.

Latgalīšu kulturys goda bolvys „Boņuks 2015” nūtikšonu atbolsta Vaļsts kulturkapitala fonds, Kulturys ministreja, Rēzeknis piļsātys dūme i Latgolys regiona pošvaļdeibys.

Tīšsaistē anketys aizpyldomys: ej.uz/Bonuks_2015. Saziņai i vaicuojumim: bonuks@rezekne.lv

Nūlykums i vaira dazynuošonys: latgalesgors.lv

Viestej:
Edīte Husare
Latgolys viestnīceiba GORS (SIA “Austrumlatvijas koncertzāle”)
Marketinga nūdalis vadeituoja

Karteņa: Gora publicitatis foto