Pyrma Zīmyssvātku, 22. decembrī, Rotko centrā tiks atkluotys treis jaunys izstuodis, informej centra puorstuovi. Izstuožu dorbi runoj par cylvāka vierteibom: leidzcīteibu, mīlesteibu, viereibu i ticeibu.

Pūļu grafiks Janusz Golik izstuodē “Mana horizonta līnija” ļaus saredzēt poša muokslinīka horizontu taišni i pastorpynuoti i dūmuot par kotra skateituoja horizontu i lineju, kas var byut i var nabyut horizonts.

Tekstilmuokslineicys Gundegys Strautmanis projekts “Mīlestības bezgalība” ir unikals ar tymā izmontuotū Braila kodu, partū muokslys dorbi ir saprūtami i redzeigajim, i naredzeigajim voi vuojredzeigajim izstuodis apmaklātuojim. Muokslineica Braila rokstā transkribējuse kristīšu lyugšonu frāzis i pīrakstejuse tuos ar sataustamu pērleišu paleidzeibu.

Puorsteigums i sovpateigs sveicīņs ir Rotko muokslys centra i Daugovpiļs dizaina i muokslys vydsškolys “Saules skola” sadarbeibys projekts – izstuode “Sajūtu Latvija. Sajūtu Latgale”, kas realizāts ar VKKF, a/s Latvijas valsts meži i Latgolys atteisteibys agenturys finansialū atbolstu. Izstuode ir taktils projekts, īeimūt tymsā i raugūt caur muokslys formom i īlyktū muokslinīciskū saturu sajust gaismu, syltumu i mīlesteibu, kū vīna daļa myusu leidzcylvāku var sajust tik itai.

Izstuodis projektu “Sajūtu Latvija. Sajūtu Latgale” ar īslāgtu apgaismuojumu varēs redzēt tik izstuodis pādejā dīnā – 2016. goda 17. janvarī.

Vysys treis izstuodis tiks atkluotys 22. decembrī 16.00. Tuos byus apsaveramys da 2016. goda 17. janvara.

Karteņā: Gundegys Strautmanis muokslys dorbs