Pyrmssvātku laikā Igauņu saime klauseituoju viertiejumam nūdūd sovu jaunū albumu “Vysi zīdi pļaveņā”, kurymā dzierdamys latgalīšu tautysdzīšmu apdaris i latvīšu ziņgis.

Igauņu saimis kapelā nu Gaigalovys dorbojās pīci diveju paaudžu muzykanti: Rasma i Gunārs Igauni, kai ari jūs meitys Laima, Marta i Liene. Jī kūpā muzicej jau cīši ilgu laiku. Juoizceļ, ka Igauņu saime ari da šam ir davuse cīši lelu īguļdejumu latgalīšu tautys muzykys populariziešonā i tradiceju uzturiešonā, kai ari ziņgu īraksteišonā i izpiļdeišonā. Praktiski vysi saimis lūcekli aktivai dorbojās muzykys jūmā i ari turpynoj pylnveiduot sovu muzykalū izgleiteibu.

Albumam davīnuots ari 16 puslopu bīzs buklets ar dzīšmu tekstim latgalīšu i latvīšu volūduos, tī ari aproksti par saimi i izpiļdeituom dzīsmem.

Par albuma īguodis vareibom var interesētīs, zvonūt Rasmai (t. 26593441) voi syutūt e-postu iz rasmaigaune@inbox.lv. Vaira informacejis var atrast ari sātys lopā baltharmonia.lv

Albums izdūts ar SIA Baltharmonia, Rēzeknis nūvoda pošvaļdeibys i Vaļsts Kulturkapitala fonda atbolstu.