Diveji koncerti, divejis jaunys izstuodis i jugendstila vakarenis atjaunuotajā Lūznovys muižā turpynuos vysaidys nūtikšonys ari 2016. godā, aicynojūt gostūs i tyvuokus, i tuoluokus apmaklātuojus muižā rast īdviesmi.

23. janvarī 15.00 Lūznovys muižys Sorkonajā zalā ar koncertu “Čells un teorba” tiks atkluots pīcu kamermuzykys koncertu cykls. Pyrmajā koncertcykla reizē muzicēs Šveicē dzeivojūšī muziki – čelliste Ilze Grudule i komponists, muzikis i muokslinīks Vincents Flikigers (Vincent Flückiger), kurs itūreiz klauseituojim skaniski atkluos mozuok zynomu muzykys instrumentu – teorbu. Programa veiduota, jemūt vārā Lūznovys muižays unikalū akustiku. Intimā kamermuzykys jutūnē skanēs Bomortjē, Vivaldi, Massis i Bonočīni čella sonatis i Kapsbergera skaņdorbi teorbai solo. Obeji muziki stuosteis i par programu, i instrumentim, kas tiks spālāti koncertā. Ilze Grudule Rēzeknis pusē zynoma kai festivala “Baroka mūzikas dienas Rēzeknē” reikuotuoja, kura koncerts sadarbeibā ar Latgolys viestnīceibu GORS pārņ izskaniejs ari Lūznovā.

Tamā pošā dīnā stuņdi pyrma koncerta, 14.00, Lūznovys muižys izstuožu ekspozicejis pīduovuojumu papyldynuos divejis jaunys izstuodis – gleznuotuoja, Latvejis Muokslys akademejis profesora, Rēzeknis Muokslys i dizaina vydsškolys direktora Osvalda Zvejsalnieka dorbu izstuode “Terra Vitae”, kurymā muokslinīks skateituojus īprīcynuos ar pādejūs godu spylgtuokajim i kruosainuokajim dorbim, kas radeiti vosorys i rudiņa plenerūs, i, sasasaucūt ar muižys arhitekturys – jugendstila – lineju, sadarbeibā ar Ungarejis viestnīceibu Latvejā tiks atkluota izstuode “Budapeštas jūgendstila plakāti”, kurymā apmaklātuojim byus vareiba redzēt 20. godu symta suoku Budapeštys īlu plakatus.

Pošuos mieneša beiguos, 30. janvarī 15.00, muižys Sorkonajā zalā otkon skanēs saksofoni – ar koncertprogramu “Sniega šūpulī” muižā muzicēs Reigys Saksofonu kvartets i Latvejis Nacionaluos operys soliste Kristīne Gailīte (soprans). Reigys Saksofonu kvartets i Kristīne Gailīte iz skotuvis kūpā sasadorboj jau vairuokys sezonys. Itamā muzykalajā sadarbeibā atrūnama cīši inovativa pīeja latvīšu komponistu solo dzīšmu atskaņuojumam, kur tradicionaluo klavīru pavadejuma lūma eipašuos aranžejuos uztycāta saksofonu kvartetam. Beleti iz obejim koncertim “Čells un teorba” i “Sniega šūpulī” īprīškpuordūšonā atrūnamys “Biļešu Paradīzes” kasēs, beletu cenys 4-6 eiro.

Sovukuort 22. janvarī 19.00 Lūznovys muiža sadarbeibā ar “Pērtnieku gardumiem” pyrmūreiz aicynoj iz eipašom gordiežu vakariņom – sveču gaismā i ar jugendstila dasadūršonu. Iedīni i dzierīni tiks daskaņuoti na tik muižys arhitekturai, nu ari tuos nazkodejūs eipašnīku, pūļu izceļsmis muižnīku Kerbedzu smolkajai garšys izjiutai. Vakareņu gaitā tiks pīduovuota vareiba nūbaudeit iedīņus kūpā ar izcili davaicuotu veinu. Vīta vakareņuos juorezervej telefoniski (26106333) da 19. janvara. Vokora izmoksys vīnai personai – 36 eiro. Vokora beiguos gosti sajims fotobukletu ar vakareņu laikā baudeitūs iedīņu receptim i īsacejumim par pīmāruotuokajim veinim.

Informacejis olūts: rezeknesnovads.lv

Karteņa: facebook.com/luznavasmuiza/