15. februārī nu 9.00 da 18.00 Reigys Sv. Pītera bazneicā muokslinīki teik aicynuoti īsnīgt sovus dorbus, kab pīsadaleitu ituo gods konkursa Jezupa Pīguožņa bolva Latvejis ainovu gleznīceibā izstuodē,  kas tiks atkluota Jezupa dīnā – 19. martā.

Reigys dūme i Preiļu nūvoda dūme sadarbeibā ar Reigys pošvaļdeibys kulturys īstuožu apvīneibu, Preiļu Viesturis i lītiškuos muokslys muzeju, Latvejis Zynuotņu akademeju, Latvejis Muokslys akademeju i Juoņa Anmaņa Jaunūs talantu atbolsta fondu 2015. godā  nūdybynuoja Jezupa Pīguožņa bolvu par lobuokū dorbu Latvejis ainovu gleznīceibā, kab veicynuotu muokslinīku iņteresi atveiduot Latvejis dobu i izcaltu Latvejis ainovu gleznīceibys nūzeimi myusdīnu muokslā.  2015. goda pavasarī Reigys Sv. Pītera bazneicā nūtyka pyrmuo izstuode “Jāzepa Pīgožņa balva Latvijas ainavu glezniecībā”. Majā tei aizceļuoja iz J. Pīguožņa dzymtū pusi, i beja apsaverama Preiļu viesturis i lītiškuos muokslys muzejā da oktobra.

Izstuodi Reigā i Preiļūs kūpā apsavēre vaira par 8000 skateituoju. Vysim izstuodis apmaklātuojim beja vareiba nūbolsuot par lobuokū tuos dalinīku. Ar puorlīcynūšu bolsu vairuokumu itymā bolsuojumā uzvarēja jaunuo muokslineica Kristīne Kvitka.

Muokslinīku atsauceiba pārņ, īsnādzūt dorbus izstuodei, beja nacarātai lela – tyka īsnāgti 229 dorbi. Ilga žūrejis komisejis dorba rezultatā izstuodei tyka atlaseitys 78 autoru 108 gleznys. Saskaņā ar žūrejis lāmumu par 2015. goda izstuodis Zalta diploma, eipašys duorgmetala medalis (autors – Juoņs Strupulis), kai ari naudys bolvys laureatu tyka nūsaukts muokslinīks, profesors Roberts Muzis. Sovukuort profesors Osvalds Zvejsalnieks sajēme Reigys dūmis specialbolvu – vareibu sareikuot sovu personalizstuodi Reigys Sv. Pītera bazneicā. Muokslinīks tai daaicynuoja kolegus i nūvodnīkus,  rodūt izstuodi “Osvalds Zvejsalnieks. Latgale. Kolēģi. Plenēri.”