Nu 25. janvara Dagdys Tautys nomā apsaverama fotoizstuode “Mirklis Rāznas nacionālajā parkā”, kas veiduota, gaidūt Rāznys nacionaluo parka desmit godu jubileju, kas byus cytugod.

Kotrā šaļteņā doba duovoj sajiutu, pīdzeivuojumu voi puordzeivuojumu. Kotrā šaļteņā cylvāks izdzeivoj kaidu stuostu voi nūtikšonu. Daudzus nu tim raudzejuši apturēt i īmyužynuot Dobys aizsardzeibys puorvaļdis Latgolys regionaluos administracejis veiduotuos izstuodis dorbu autori.

Izstuodis veiduotuoji aicynoj iz šaļti apsastuot i īsavērt šaļtenis radeitajā nūskaņā. Apsastuot, kab īpazeitu, apbreinuotu, atguoduotu i, īspiejams, arī apmaklātu vīnu nu eipaši aizsorguotuom dobys teritorejom Zylūs azaru zemē – Rāznys nacionalū parku.

Rāznys Nacionalais parks ir jaunuokais Latvejā i vīneigais Latgolā. Par nacionaluo parka dzimšonys dīnu teik skaiteits 2007. goda 1. janvars – taišni tod stuojuos spākā Rāznys nacionaluo parka lykums. Rāznys nacionalais parks izveiduots, kab saglobuotu Rāznys azara i ar tū saisteitūs sugu i biotopu daudzveideibu, teritorejis kulturviesturiskuos i ainovyskuos vierteibys, kai ari veicynuotu teritoreju nanūplycynūšu saimnīciskū atteisteibu, dobys turismu i ekologiskū izgleiteibu. Rāznys nacionalais parks ir īkļauts Eiropys Savīneibys aizsorguojamūs teritoreju teiklā NATURA 2000 i ES nūzeimis putynim nūzeimeigū vītu sarokstā. Nacionaluo parka plateiba ir 59 615 ha.

Fotoizstuode Dagdā apsaverama dorba dīnuos nu 9 da 17 stuņžu.