Konkursā par radejis raidejumu veiduošonu latvīšu volūdā 2016. godā Latgolys regionalajūs i vītejūs elektroniskajūs plošsazinis leidzekļūs uzvarēja producentu grupa SIA “Lietišķā Latgale”.

Nacionaluo elektroniskūs plošsazinis leidzekļu padūme 28. janvara sēdē apstyprynuoja uzvarātuoju konkursā par radejis raidejumu veiduošonu latvīšu volūdā 2016. godā Latgolys regionalajūs i vītejūs elektroniskajūs plošsazinis leidzekļūs.

Konkursā tyka sajimts tik vīns dasacejums, i tys beja nu SIA “Lietišķā Latgale”.

“Lietišķā Latgale” pīduovoj veiduot radejis raidejumus “Pi myusim Latgolā” latvīšu i latgalīšu volūdā. Raidejumus paradzāts puorraideit vītejuos i regionalajuos radejuos – Latgolys Radejā, “Ef-Ei”, “Divu krastu radio”, “Radio Marija Latvija”, kai ari škārsteiklā.

Producentu grupa sabīdryskuo pasyutejuma ītvorūs veiduos divejus raidejumus nedeļā ar kūpejū originalsatura garumu – 40 minutys. Tys byus kasnedelis raidejums par kulturu i viesturi, kai ari raidejums par sabīdriski politiskom temom. Konkursa finansiejums itam godam ir 35 571 eiro.

Konkursu par raidejumu veiduošonu latvīšu volūdā 2016. godā Latgolys regionalajūs i vītejūs elektroniskajūs plošsazinis leidzekļūs, kas raida radejis programys, NEPLP izsludynuoja 7. janvarī. Konkursā beja aicynuotys pīsadaleit regionaluos i vītejuos radejis i producenti voi producentu grupys, kas atsarūn Latgolys planavuošonys regionā, kai ari Latgolys kulturviesturiskajā teritorejā.

Izsludynojūt četrus konkursus par radejis i TV programu veiduošonu Latgolā, NEPLP ituo gods suokuos suoce eistynuot Latgolys elektroniskūs medeju programu, kuruos mierkis ir styprynuot Latgolys informativū sasaisti ar puorejim Latvejis apgobolim i garantēt, ka Latvejis pīrūbeža dzeivuotuoji teik informāti par vaļstī nūteikūšajim procesim i storptautyskūs nūtikšonu atteisteibu.