20. februarī nūtiks vēļ nabejs pasuokums “Izbaudi ziemu Ziemeļlatgalē”, kuruo ītvorūs vysys dīnys garumā Bolvu, Viļakys, Kuorsovys i Baļtinovys nūvodūs nūtiks zīmeigys aktivitatis, informej Kuorsovys nūvoda turisma organizatore Inga Bernāne.

Bolvu nūvodā bišu saimisteibā “Silaunieki” varēs gatavēt voska svecis smuordeigim i gaišim vokorim, zyrgu sātā “Kapulejas” varēs izavyzynuot iz nabādu i zyrga mugorā, i rogovuos. Sovukuort Brīžucīma senejūs omotu meistari izvess jius Meteņiem i zīmai rakstureigūs daņčūs i rūtaļuos, kas aizraus i lelus, i mozus, i mīluos ar svaigi captu maizi i gordu zuoļu čaju, cikom cyti vuiceisīs aust. Bolvu muzeja durovys byus attaiseitys vysim apmaklātuojim, kab stuosteitu par Zīmeļlatgolys tradicejom, kulturviesturi, senejim omotim i kulturvidi, kai ari paraudzeitu digitalūs ekspoziceju vareibys.

Viļakys nūvodā jau nu agra reita varēs īsapierkt Lauku lobumu tierdzeņā, nu tī, kas ir ceiruli piec dobys, teik gaideiti iz Tepenicys azara atkluotū Zamlada zyvu giušonys čempionatu. Anna Āze sovā Meža ekspozicejā stuosteis i īsaisteis jius dobys izpietis procesā, kai ari izvess nalelā pastaigā pa mežu. Kulturviesturis sātā “Vēršukalns” varēs pīsadaleit maizis cepšonys procesā eistā lauku ceplī, baudeit tikū captu maizeiti i klauseitīs stuostūs par latgalīšu dzeivisziņu. Meža lobumu cīmā varēs degustēt meža gordumus, gatavēt zīpis, dekupažu iz skaidu, kai ari īsaguoduot kaidu Meža muotis lobumu.

Kuorsovys nūvodā kūpā ar Dobys aizsardzeibys puorvaļdis specialistu varēs izzynuot dobys parku “Numernes valnis”, vāruot dobu zīmā i interaktivā veidā atkluot vysaidus meža nūslāpumus. Piec pateikamys pastaigys svaigā gaisā Malnovys maizneicā “Dzīles” gaideis saimineica Aina, kab pabaruotu ar Latgolys kulinarū pērli – asuškom – i pīduovuotu meistarklasis maizis cepšonā. Saļņovys muižys parks vysys dīnys garumā byus pīpiļdeits ar sportiskom aktivitatem, tiks reikuots atkluotais hokeja turnirs i organizātys atraktivys izdareibys snīgā, nu tūs, kas nūsoluši, gaideis sylts čajs i gorda putra.

Baļtinovys nūvodā byus vareiba pīsadaleit orientiešonuos pasuokumā “Iepazīsti Baltinavu” i palikt par ituo Zīmeļlatgolys nūvoda ekspertu. Baļtinovys nūvoda muzejā tiks reikuota zīpu meistardarbneica, kur varēs izgatavēt sev breineigu i smuordeigu duovonu.

Dīnys beiguos vysi teik aicynuoti iz pasuokumu kulturys montuojuma centrā “Upīte”, kur kūpā ar folklorys kūpu “Upīte” varēs īt daņčūs i rūtaļuos. Sovukuort da reita gaismys daņcī lēkt liks jaunuo i talanteiguo latgalīšu jaunīšu grupa “Unknown artist”.