5. februarī Latvejis Radejis (LR) žurnalistam Bronislavam Sprydzānam, kas 3. Atmūdys suokumā atjaunuoja i garus godus vadeja raidejumus latgalīšu volūdā, palyktu 75.

Daudzi veļ nūteikti atguodoj naaizmierstamū 2011. goda 5. februari, kod talanteiguo žurnalista i dziļa Latgolys patriota Bronislava Sprydzāna 70. dzimšonys dīnā Rēzeknis Kulturys nomā, kas pīguoja pylnum pylns ļaužu na tik nu Latgolys molu molu, nūtyka latgalīšu volūdys gūdynuošonai veļteitais sareikuojums, kurā Bronislavs tyvim i tuolim gostim demonstrēja vysaidu Latgolys nūvodu izlūksnis, kas beja rodušys atspeidynuojumu juo taiseitajūs raidejumūs. Apveļteits ar volūdys “absolutū dzierdeibu”, Bronislavs naklaideigai varēja pasaceit, nu kura pogosta ir satyktais sarunu bīdris, nareši tai izbreineidams ni vīnu vīn. Sovu latgalīšu volūdu Bronislavs cīši kūpe, napalaizdams garum naizskaiteitu nivīnu gruomotu voi cytu rokstu golu dzymtajā volūdā, maklādams i lykdams lītā seņ aizmierstus vuordus, prīcuodamīs par jūs atsagrīsšonu i aizaleipsnuošonu nu jauna.

Bronislava Sprydzāna vadeitais “Latgolys vuords” Latvejis Radejis eterā skanēja nu 1989. goda 2. apreļa da 2013. goda oktobra beigu, pat tymā laikā, kod ekonomiskuos krizis deļ LR naatroda leidzekļu juo veiduošonai. Bronislavs vys tik turpynuoja regulari braukt iz sareikuojumim vysaiduos Latgolys vītuos i stuosteit par jim vysai Latvejai.

Nu 1990. goda breineigais žurnalists vadeja i vasalu vērtini Mozuokumtauteibu kulturys bīdreibu raidejumu lītaunīku, azerbaidžaņu, armieņu, piečuok ari igauņu, greku, tataru volūduos.

Bronislavs Sprydzāns pieški nūmyra 2014. goda 1. aprelī, juo atdusys vīta ir Ikškilē Lozdukolna kopūs.