Nu 26. februara da 7. apreļa Latgolys viestnīceibā GORS byus apsaverama gleznuotuoja Roberta Muža personalizstuode “Latvija. Ainava. Portrets”, kurymā tiks eksponāta plaša ainovu retrospekceja, kai ari Latvejis viesturē nūzeimeigu personeibu portretu izlase, informej muokslys izstuožu kuratore Guna Kalnača.

Ar itū izstuodi tiks atkluota Latgolys viestnīceibys GORS muokslys galereja, kas iz prīšku koncertzala apmaklātuojim pīduovuos Latvejis kulturtelpā nūzeimeigu i interesantu vysaidūs žanrūs struodojūšu muokslinīku dorbu kolekcejis.

Roberts Muzis (dz. 1944. g.), nu jau pats byudams pedagogs ar 40 godu akademiskuo dorba stažu, sevi skaita par profesora Induļa Zariņa skoļnīku, vuicejīs Jaņa Rozentāla Reigys Muokslys vydsškolā, piečuok Latvejis Muokslys akademejā. Struoduojs vysūs gleznīceibys žanrūs, tok vaira zynoms kai minimalistiskys ainovys meistars.

“Kai vairums muokslinīku, ari Roberts Muzis skaita, ka gleznīceibys byuteiba ir kruosa. Kluot vēļ jis soka, ka poša gleznīceiba ir absoluts bezizmāra jiedzīņs, nu tuos aizdavums ir saceit tū, kū var izsaceit tik ar kruosu. Vīnkuorši motivi, gondreiž bez detaļu, minimali izteiksmis leidzekli. Nikaidu gleznīcisku triku, smukumu i uzsluoņuojumu. Teira telpa – gaiss,” tai juo kataloga īvodā roksta muokslys zynuotneica Ingrida Burāne.

Muokslinīks par tituldorbu Rēzeknis izstuodei izlasejs tymsnejū, zemis tūņūs gleznuotū ainovu “Rudens”, par kurū 2015. godā sajiems zalta medaļu i diplomu kai pyrmais Jezupa Pīguožņa bolvys Latvejis ainovu gleznīceibā laureats.

Izstuodē varēs īpazeit Robertu Muzi ari kai portretistu. Jis gleznuojs vairuoku Latvejis vaļsts prezidentu portretus, kai ari ījiuteigai portretiejs Latvejis viesturē nūzeimeigys personeibys. Latgolys viestnīceibā GORS apsaverami Andryva Spāģa, Ata Kronvalda, Krišjuoņa Barona portreti.

Muokslinīks itūšaļt ir profesors Latvejis Universitatē, struoduojs vairuokuos Latvejis augstškoluos, vysilguok Latvejis Muokslys akademejā.

Publicitatis karteņa: “Rudens”, 2010. g. Audakls, akrils. 55 x 90 cm