Bolvu piļsātys i Bolvu muižys svātku nedelis ītvorūs tyka prezentāta gruomota “Sports Ziemeļlatgalē: ceļš līdz Olimpiskajai medaļai”, kas izdūta ar Bolvu nūvoda pošvaļdeibys atbolstu. Gruomota ir viestejums par Zīmeļlatgolys aba bejušuo Abrenis i Bolvu rajona sporta atteisteibu i sasnāgumim 20. godu symtā, informej Bolvu nūvoda puorstuove Rita Šubeniece.

Autore Irena Šaicāne gruomotu pīrakstejuse kai viesturisku pietejumu, bolstūtīs iz daudzveideigim informacejis olūtim, izpietejuse golvonūs sporta veidu atteisteibu Zīmeļlatgolā.

Gruomotys materials sakuortuots 19 nūdaļuos. Tuos suokuos ir viesturisks puorskots, suocūt jau ar 20. godu symta 30. godim. Gruomotā vysvaira raksteits par vīglatletiku. Atrūnama informaceja ari par futbolu, volejbolu, basketbolu, handbolu, svorceļšonu, greku – rūmīšu ceiņom, svorbumbu ceļšonu, orientiešonūs i turismu, šahu, dambreti, motosportu, autosportu, smaiļuošonu, kanoe, pat par alpinismu, kai ari cytim sporta veidim.

Gruomotys nūbeigumā ir personu ruodeituojs, kurymā īkļauts ap 1300 personvuordu – vysi tī sportisti, kas bejuši komandu dalinīki, individuali sportisti, sporta školuotuoji, kas pīsadalejuši sporta atteisteibā, tykuši pi panuokumu vītejā, nacionalā i storptautyskā mārūgā.

Gruomotys pādejuo nūdaļa atvālāta Baļtinovys sportistam – Arvim Vilkastem, kurs 2014. goda februarī 22. zīmys olimpiskajuos spēlēs Sočūs izceineja sudobra medaļu bobslejā. Itei nūdaļa napuorprūtami veicynoj skaiteituoju dūmuot pozitivys dūmys, uzmundrynoj i roda īdvasmu sasnīgt vaira.