21. februarī 16.00 koncertzalā “Ave Sol” nūtiks kamerkora “Muklājs” nūslādzūšais latgalīšu dzīšmu programys “Ar Laimeņu runojūt” koncerts, kurymā tiks atskaņuotys taida poša nūsaukuma albumā īraksteituos i cytys latgalīšu dzīsmis nu kora repertuara.

“Koč i tradicionali latgalīšu dzīsmis izpylda Latgolys kolektivi, tai nūdrūšynojūt sova nūvoda kulturys tradiceju saglobuošonu i populariziešonu, mes asam guojuši cytaidu ceļu. Reigys kamerkors “Muklājs” i latgalīšu dzīsmis ir sovpateiga muzykys savīneiba, kas akcentej latgalīšu tradiceju i muzykys kluotbyutni Latvejis kulturtelpā. Kora skaniejums ar itū repertuaru ir palics azartiski izjusts i kruosains ar sovpateigu volūdys i muzykaluo skaniejuma akcentu. Novembrī ar itū programu gastejom Krystpilī i Daugovpilī, kai ari Reigā Mozajā gildē, nu janvarī pabejom Reigys kulturys centrā “Iļģuciems”. Nūslādzūšais koncerts nūtiks “Ave Sol”, i byutiskuokais itūreiz ir tys, ka disks niu ir ari daīmams,” soka “Muklāja” muokslinīcyskais vadeituojs Juoņs Kokins.

“Maņ kai dzymušam latgalīšam itys beja gūda dorbs vairuoku godu garumā, i niu ir daguojs laiks tū “palaist tauteņuos”,” dasoka Kokins. Ari kora dalinīku vydā ir vairuoki ar Latgolys saknem saisteiti dzīduotuoji, kuri radeja gribiešonu i motivaceju naaizmierst i popularizēt latgalīšu volūdu i kulturys daudzveideibu Latvejis kulturtelpā.

Albumā apkūpuotys vysaidūs laikūs radeitys latgalīšu tautysdzīšmu apdaris i originaldzīsmis. Vairuoku godu garumā itam nūlyukam eipaši dalaseits repertuars, tymā skaitā komponisti aicynuoti radeit originaldzīsmis latgalīšu volūdā. Eipašs, kamerkoram “Muklājs” veļteits skaņdorbs, ir Agnetys Krilovys “Meitines dzīsma” ar Raiņa vuordim. Albumā ir īmyužynuotys latgalīšu dzīsmis J. Vaivoda, I. Rupainis, E. Skukis, V. Pūcis, J. Graubiņa, V. Rudušys, N. Vītinis i cytu komponistu muzykalajā interpretacejā. Kamerkors “Muklājs” lepojās, ka albumā īkļauta ari Latgalīšu kulturys bolvys “Boņuks 2014” nominacejā “Lobuokais snāgums akademiskajā muzykā” uzvariejušuo dzīsme – R. Dubrys “Tu skaistuo Dīva duorza rūze”.

Dzīšmu gors, latgalīšu lapnums i patriotiskums, vīnojūša kūpeibys sajiuta, syltums i smeļdze sasaveis itymā koncertā. Īīšonys moksa ir 1,50 eiro. Beletus varēs nūpierkt koncerta nūtikšonys vītā vīnu stuņdi pyrma tuo suoku.

Latgalīšu dzīšmu diska “Ar Laimeņu runojūt” īraksteišonu atbaļstejs Vaļsts Kulturkapitala fonds i projektubanka.lv. Albums izdūts janvarī, i tū var īsaguoduot, rokstūt iz kamerkorismuklajs@gmail.com.