Latgalīšu kulturys goda bolva “Boņuks 2015” par myuža īguļdejumu latgalīšu kulturā itūgod tiks padūta katuoļu pravestam, kulturviesturnīkam i sabīdryskajam darbinīkam Albertam Budžem, informej Latgolys viestnīceibys GORS mārketinga nūdalis vadeituoja Edeite Husare.

Svātdiņ, 28. februarī, Latgolys viestnīceibā GORS nūtiks Latgalīšu kulturys goda bolvys “Boņuks 2015” svineiguo ceremoneja, kurymā tiks gūdynuots 2015. goda veikums latgalīšu kulturā 19 nominacejuos literaturys, muzykys i sabīdreibys i kulturys kategorejuos. Nominacejis “Par myuža īguļdejumu latgalīšu kulturys atteisteibā” gūdu itūgod sajims Alberts Budže – aktivs sabīdryskais i kulturys darbinīks, izcyls paguotnis pietnīks i nūvoda viesturis apzynuotuojs.

Alberts Budže dzims 1930. goda 26. janvarī Reigā. Juo dzymdynuotuoji Donats i Tekle bejuši nu Leivuona pusis i iz Reigu puorsacāluši piec 1. pasauļa kara. Alberts Budže dzims i izaudzs religiozā saimē. Vuicejīs G. Merkeļa 20. pamatškolā i Reigys 1. vydsškolā. Piec vydsškolys beigšonys 1949. godā suocs struoduot Reigys gruomotu antikvariatā, nu 1952. godā, kod tikū attaiseja Goreigū seminaru, izsuocs tymā vuiceibys. 1957. goda 30. majā veiskups Pīters Strods īsvietejs jū par prīsteri. Kolpuojs Reigys Sv. Ontona bazneicā, Majuoru, Slūkys, Kemeru, Preiļu i Rībeņu katuoļu draudzēs. Nu 1991. goda kolpoj Tiļžys i Ruguoju draudzēs, prīsteru nabyušonā kluotyn jis ir apkolpuojs ari Kryšānu, Škilbānu i Baļtinovys draudzis.

Albertu Budži aizraun nūvoda kulturviesturis i pasauļa nūtikšonu sakareibu vaicuošona, jis ir pietejs dominikaņu, jezuitu i cytu goreigūs ordiņu darbeibu Latgolā, Latgolys vītvuordu saisteibu ar cytu vaļstu vītvuordim, savuocs materialus i pīrakstejs aprokstus par īvāruojamim i aizmierstim prīsterim, sasadorbuojs ar Bolvu pusis kulturys īstuodem, gatavejs aktualus puorskotus i pīsadalejs ar tim nūvodpietnīceibys konfereņcēs. Pravests Alberts Budže par kulturpietnīciskū i sabīdryskū darbeibu apbolvuots ar Latvejis Republikys Kulturys ministrejis Atzineibys rokstu (2000).

Latgalīšu literats i nūvodpietnīks Ontons Slišāns par pravestu gruomotā “Čipierksneits jeb apcirsto sakņu pieaudzēšana” nazkod sacejs: “Paļdis Dīvam, ka myusim ir taids Alberts Budže, kurs nasavteigi, ar Dīva vuordu iz lyupom, spiej sevi veļteit myusu latgaliskajai kristeigajai kulturviesturei! Alberts Budže vysod ir ceļā. Juo dzeive ir namiteigs ceļaveira guojums iz prīkšu, caur namiteigu paguotnis izpieti i ciļvieceigūs sakņu kūpšonu, caur pīminis atjaunuošonu, caur pīminis uzturiešonu, caur pīminis radeišonu!”

Sajamūt viesti par izsaceitū atzineibu, pravests īrostajā pīticeibā tik nūsoka: “Nikuo taida jau es naasu darejs! Naasu ni deputats, ni ministrys, ni veiskups. Vysus šūs godus tik asu darejs sovu dorbu. Vyss ir dareits Dīva gūdam! Ļūti interesanti ir pieteit sovu paguotni.”

Svineiguo bolvys padūšonys ceremoneja byus ituo goda 28. februārī 16.00 Latgolys viestnīceibys GORS Lelajā zalā. Ceremonejis pyrmajā daļā tiks izruodeits uzvadums „Saule. Bērni. Rainis”, kurīs radeits pyrmajā vargaņu muzykys festivalā  „ORGANismi”, bet ceremonejis ūtrajā daļā tiks gūdynuoti nūtikšonys, ļauds i aktivitatis, kas latgalīšu kulturā bejuši svareigi 2015. godā.

Latgalīšu kulturys goda bolvys „Boņuks 2015” nūtikšonu atbolsta Vaļsts kulturkapitala fonds, Rēzeknis piļsātys dūme,  Rēzeknis nūvoda, Daugovpiļs nūvoda, Bolvu, Kuorsovys, Cyblys, Dagdys, Ludzys, Leivuona, Viļakys, Ruguoju i Baļtinovys nūvodu pošvaļdeibys, Nacionalais Kinu centrys.

Puorejūs kategoreju nominantu saroksts

Kategorejis “Radejis hits” nominanti

“Boņuks 2015“ ceremoneju tīšraidē varēs redzēt “LMT Straume“ http://straume.lmt.lv/lv/kultura/kultura/bonuks/1844.