Grupa “Sala” nu Kuorsovys nūvoda Saļņovys pīduovoj nūsaklauseit dzīsmi “Vasaras vēstules”, kuruos muzykys autore ir Rasma Kulamova, nu teksta – Ārija Elksne.

Vokali instrumentaluo ansambļa p.s. SALA jaunuo viesture suocēs 2012. goda 13. majā, kod Saļņovys kulturys nomā kūpā saguoja muzykanti, kas paguojušuo godu symta 80.-90. godūs spielēja balus vysaiduos grupuos. Pyrmais lelais bals beja 2012. goda Juoņu dīnā Saļņovys kulturys nomā.

Grupys pyrmajā sastuovā beja: Rasma Kulamova (tausteni, vokals), Andris Jurāns (sytamī instrumenti), Felikss Palms (ritma gitara), Solvita Vilka (vokals), Jurs Linužs (basgitara, grupys pamats i vierzeituojspāks).

2013. goda 17. februarī ar Arņa Slobožanina i Džeimsa Boterila atbolstu i aktivu leidzdaleibu tyka īraksteits grupys pyrmais singls “Mīli mani!” (Rasmys Kulamovys muzyka, Rasmys Urtānis teksts).

2013. godā nūtyka sastuova izmainis – grupai dasavīnuoja Ligita Žukovska (vokals, flauta), 2014. godā – Edgars Potašs (ritma gitāra) i Aija Čoiča (saksofons).  2015. godā roduos ideja kūpprojektam ar Juoni Poplavski (vokals).

Itūšaļt “Sala” pamozom struodoj pi pyrmuo albuma.

Eipašu pateiceibu par atbolstu “Sala” soka Saļņovys KN direktorei Valentinai Kirsanovai i Arņam Slobožaninam.