Ituo gods Leldīņu laiks Latgolys viestnīceibā GORS 24. martā aizasuoks ar Latvejis Radejis kora izdzīduotū Volfganga Amadeja Mocarta “Rekviēmu“, kuruo atskaņuojumā pīsadaleis ari Latvejis Nacionalais simfoniskais orkestris. Koncertā taipat izskanēs Andreja Selicka Latgalīšu kulturys goda bolvu “Boņuks” i Lelū muzykys bolvu sajāmušais skaņdorbs “Šyupuļdzīsme Jēzum”, informej GORA puorstuove Edeite Husare.

Volfganga Amadeja Mocarta (1756–1791) “Rekviēms“ ir geneja muzykalais testaments – juo pādejais dorbs, kas palics par vīnu nu vysu laiku popularuokajom partiturom. Slavi itys monumentalais skaņdorbs īmontuojs na viņ tuo puorlaiceiguo skaistuma i viestejuma deļ, nu ari, pasasokūt legendom, kas apvyn tuo radeišonu. Nūslāpumainais svešinīks, kas dyžonajam Vīnis klasikam pasyutynuoja “Rekviēmu“ – myrušūs pīminis mišu, komponistam asūt asociejs ar poša smierts viestnesi. Dorbu pi ituos kompozicejis Mocarts suoce 1791. godā, jau asūt cīši slyms, i naaizspēja pabeigt… Komponista smierts šaļtī pabeigta beja tik “Rekviēma“ pyrmuo daļa “Requiem aeternam”, cytom izstruoduotys beja melodiskuos linejis voi pavodūšuo basso continuo parteja, vītom izrokstūt ari detalizātuokus instrumentalūs bolsus. “Rekviēma“ partituru sakuortuoja i pabeidze Mocarta laikabīdrys, austrīšu komponists Fraņcs Zīsmeijers. Meistardorbs, kas car godu symtim aizgivs cylvāku sirds i rūsynuojs iz klusynuotom puordūmom par dzeivi, smierti i myužeibu Latgolys viestnīceibā GORS izskanēs Lelajā catūrtdīnē.

Koncertā pīsadaleis: Latvejis Radejis kors, Latvejis Nacionalais simfoniskais orkestris, Jolanta Strikaite-Lapiņa (soprans), Īva Parša (mecosoprans), Juoņs Kurševs (tenors), Rihards Millers (bass), dirigents Sigvards Kļava.

Eipaša koncerta šaļts byus vareiba vēļreiz Rēzeknē dzierdēt Latvejis Radejis kora jubileja koncertā taišni Latgolys viestnīceibā GORS pyrmatskaņuotū Andreja Selicka skaņdorbu “Šyupuļdzīsme Jēzum”, kurs tikū sajiems Lelū muzykys bolvu 2015 kai Goda jaundorbs i sirsneigū pošu latgalīšu atzineibu Latgalīšu kulturys goda bolvā “Boņuks 2015”. A. Selickis īrūsmi skaņdorbam atrads ukraiņu komponista Valentina Silvestrova kora cykla, kurū reiz atskaņuojs Latvejis Radejis kors, ukraiņu Zīmyssvātku tautysdzīsmē, kurymā Jaunova Marija, mydzynojūt Jezus bierneņu, soka: “Ļauds gatavej Tev krystu!”, kas komponistu cīši aizgivuse.

Mocarta “Rekviēms” i “Šyupuļdzīsme Jēzum” Latvejis Radejis kora izpiļdejumā Latgolys viestnīceibā GORS izskanēs 24. martā 18.00. Beleti iz koncertu atrūnami Latgolys viestnīceibys GORS i “Biļešu Paradīze” beletu sistemuos.