4. majā, Latvejis Republikys naatkareibys atjaunuošonys svātkūs, Rēzekne trešū godu aicynoj pīsadaleit draugu velobraucīnī, ūtrū godu nūtiks skriejīņspēle, nu finišā Sporta stadionā itūgod vysus dalinīkus aicynoj īsasaisteit zibakcejā i izveiduot Latvejis konturu. Piec sportiskuo reita varēs dūtīs iz Boltuo goldauta gūdim Kulturys i atpyutys parkā, kur skanēs dzīsmis i byus svātku gūda iedīni. Vokorā Rēzeknis Tautys teatra pyrmizruode Rēzeknis KN i svātku lelkoncerts Latgolys viestnīceibā GORS, informej Rēzeknis Kulturys i Turisma centra puorstuove Maija Upeniece.

Trešū godu Rēzeknē nūtiks Draugu velobraucīņs “Rēzeknes serpentīns”, kas itūgod byus vysā garuoks kai īprīkšejūs godūs i ritiņbraucieji varēs apsavērt i piļsātys centru, i izbaudeit upis krosta ainovys. Piec atsauceibys viņgod, ūtrū godu nūtiks ari Vidis izzinis skriejīņspēle “Ieraugi neparasto Rēzekni!”, tamā var īsasaisteit vysi, kam nav ritiņa i atkluot Rēzekni nu jauna. Registraceja velobraucīņam i skriejīņspēlei nu 9.00 Rēzeknis piļsātys dūmē.

Svātki īsasuoks ar dūmis vadeibys svineigu uzrunu i Latvejis himnu pi pīminekļa “Vīnuoti Latvejai”.  10.00 tiks dūts starts Draugu velobraucīņam i skriejīņspēlei. Velobraucīņa finišs itūgod byus Sporta puorvaļdis stadionā (18. novembra īlā 39), kur 10.40 vysus dalinīkus aicynoj īsasaisteit zibakcejā “Veidojam Latviju!”.

Piec zibakcejis svātku aktivitatis turpynuos Rēzeknis Kulturys i atpyutys parkā (Raiņa īlā 29a), kur apbuolvuos i velobraucīņa komandys, i skriejīņspēlis uzvarātuojus, i tradicionali preteimā parkam Raiņa īlā 11.00 velobrauciejim nūtiks Veiklys braukšonys saceņseibys.

Sovukuort Kulturys i atpyutys parkā 11.00 vysi teik aicynuoti iz Boltuo goldauta gūdim. Latvejis vaļsts symtgadis svineibu īskaņuos, atsasaucūt iz Kulturys ministrejis aicynuojumu, varēs saīt pi kūpeiga golda, kur saimnīkuos Sarmeite Stepiņa i Jurs Vucāns, īsaistūt svātku dalinīkus golda sarunuos, golda dzīsmēs i mīlojūt ar vysaidim Latgolys gordumim.

Svātku gūda lobumus pīduovuos šova “Īstās latvju saimnieces” Latgolys nūvoda dalineicys Vija Kudiņa, Sarmeite Stepiņa i Aina Barsukova, byus ari “Pērtnieku gardumi”, “Sātys dasys”, “Rūtys pernīki”, škārsteikla kulinarejis šova “Būreic” kulinarī naparostumi, Rēzeknis tehnikuma tūpūšūs povuoru gordumi. Sovukuort popgrupa “Mākonītis”, dzīsminīki Eriks Kančs i Armīns Apeins, vokaluo grupa “Noskaņa”, folklorys kūpa “Rūta” i Maltys lauku kapela prīcynuos ar skaneigom dzīsmem.

Skateituojus prīcynuos ari sporta komandu demonstriejumi, sevkurs varēs pīsadaleit interaktivā konkursā “Vai pazīsti Latviju?”, īsasaisteit ARPC “Zeimuļs” i bīdreibys “Eņģeļi ar mums” rodūšajuos darbneicuos.

Pasuokuma laikā dorbuosīs ari svātku tierdzeņš, kur varēs īsaguoduot i tautys daiļomota meistaru darynuojumus, i lauku lobumus.

Svātku turpynuojums byus Rēzeknis kulturys nomā (Bruoļu Skryndu īlā 3), kur 16.00 Rēzeknis Tautys teatris prīcynuos ar lītaunīku autoris Daivys Čepauskaitis lugys “Pupas” pyrmizruodi latgalīšu volūdā Muorys Zaļaiskalns režejā. Tei ir komedeja par puora kasdīnys nasaskaņom i streidim, puori, kurī, īsprūstuoti lifta kabinē, divatā pavoda vairuokys stuņdis. Apstuokli, kod pādejuo stuņdeite ruodīs asam kluotyn, līk Alfonam i Brigitai ceļt gaismā senejus nūslāpumus i paust atsazeišonys – i smīkleigys, i skumeigys – raibys kai cylvāka myužs, kai pupys zīds (īīšona iz izruodi – 3 i 2 eiro).

Svātku dīna nūsaslēgs Latgolys viestnīceibā GORS ar grupys “ElektroFolk” svātku lelkoncertu. Kai soka grupys izveiduotuojs Ainārs Majors: “4. majā skateituoji pīdzeivuos muzykaluos mīlesteibys i breiveibys svātkus, kur apsavīnoj laikmati – seneja tautys dainu gudreiba, myusdīneiga skaņa i reibynūši nuokūtnis sapyni, kurūs atnas video i gaismys muokslys pasauļs.” (Beleti iz koncertu: 9 – 16 eiro.)