19. aprelī Latvejis Nacionalajā bibliotekā, Juoņa Puovula II laseitovā, nūtyka gruomotys “Monsinjors Pēteris Vilcāns 1929-2012” i CD “Promesa” prezentacejis pasuokums, informej Monsinjora Pītera Vilcāna pīminis fonda vaļde.

Pasuokumu apmeklēja Viļakys, Kuorsovys, Leivuona, Preiļu  draudzis, pošvaļdeibu puorstuovi, lyugti gosti nu Latvejis piļsātu, nūvodu i projekta atbaļsteituoji i realizātuoji. Pasuokumā pīsadaleja monsinjora dzymtuo Krystpiļs nūvoda Atašīnis katuoļu draudze ar prāvestu V. Nagli i folklorys kūpu “Vīraksne”.

Monsinjors Pīters Vilcāns dzims 1929. goda 16. janvarī Atašīnis pogosta Nārtys Staleidzānūs Krystpiļs nūvodā, ordināts 1951. goda 28. martā. Kolpuojs vairuokuos Latgolys piļsātu i nūvodu draudzēs – Aglyunā, Rušyunā, Bieržgalī, Nīdermuižā, Juosmuižā, Preiļūs, Kuorsovā, Ruskulovā, Viļakā, Līpnā, Kuprovā, Ludzā, Pušmucovā, Leivuonā.

2001. goda 12. novembrī Rūmys pavests Juoņs Puovuls II jū īcēle par sovu kapelanu (Capellanus Suae Sanctitatis). Pamatuojums: uzticeiga kolpuošana Bazneicai. Myužeibā monsinjors Pīters Vilcāns aizguoja 2012. goda 29. oktobrī.

Monsinjora Pītera Vilcāna pīminis fonds tyka nūdybynuots 2013. goda beiguos. Tuo vaļde izvierzeitūs mierkus ir eistynuojuse i ir pateiceiga vysim atbaļsteituojim –  2014. goda oktobrī pastateits pīmineklis monsinjora atdusys vītā Leivuona Rūmys katuoļu Svātuo Mikeļa Erceņgeļa bazneicys duorzā i niu izdūta gruomota “Monsinjors Pēteris Vilcāns” i CD “Promesa”. Izveidota ari sātys lopa monsinjorspeterisvilcans.lv.