Svātdiņ, 22. majā, Naujinis pogosta Slutiškūs nūtiks Storptautyskais tautys muokslys festivals “Augšdaugava 2016”, informej Daugovpiļs nūvoda Kulturys puorvaļdis vadeituoja Ināra Mukāne.

Itūgod pasuokumā tiks akcentāta Augšdaugovys simboliskuo nūzeime Latvejis naatkareibys atjaunuošonā. Paguojs 30 godu nu laika, kod žurnalisti Daiņs Īvāns i Artūrs Snips 1986. godā suoce publicēt legendarū rokstu sereju “Par Daugavas likteni domājot” laikrokstā “Literatūra un Māksla”, nūruodūt iz ekonomiskajim i estetiskajim zaudiejumim, kurūs radeitu Daugovpiļs HES celtnīceiba gleznainajūs Daugovys lūkūs. Tys izraiseja lelu rezonansi sabīdreibā i aizsuoce kusteibu pret hidroelektrostacejis celtnīceibu. Ceiņā par Daugovys īlejis saglobuošonu īsasaisteja lelys ļaužu masys, kas beja suokuma platforma Tautys frontei i ceiņai par Latvejis naatkareibu. “1987. godā tyka paziņuots M. Gorbačova lāmums puortraukt HES celtnīceibu, koč beja īguļdeits jau 20 miļjonu rubļu. Mes uzvarejom,” saceja D. Īvāns.

Ituo gods festivala programā paradzāta pīminis šaļts Markovys kopūs, atguodojūt kusteibu pret Daugovpiļs HES celtnīceibu. Eipaša nūtikšona byus Slutišku Dobys i kulturys studeju aplis školu jaunatnei, kū vadeis īvāruojami Latvejis sabīdriskī i kulturys darbinīki. Studeju apļam da 2. maja var dasasaceit 5.-12. klašu audziekni – lobuokūs zynuotniskūs dorbu autori literaturys, viesturis i dobyszynuotņu, cytuos nūzarēs i jūs školuotuoji.

Pasuokuma apmaklātuojus prīcynuos muokslinīka Igora Pliča lelformata fotografeju izstuode “Daugav’ abas malas…”, kas tiks eksponāta Slutišku solys vidē. Byus vareiba nūsavērt LTV kinu “Viens ciems. Visa Latvija. Slutišķi” i sasatikt ar tuos scenareja autori Nuoru Ikstenu.

Festivala programā paradzāti vairuoki koncerti, kur sovu daleibu aicynuoti dasaceit tautys muokslys kolektivi. Nūtiks ari lels omotnīku produkcejis i lauku lobumu tierdzeņš, tautys sporta saceņseibys, vidis izgleiteibys aktivitatis i rodūšuos darbneicys.

Dasacejuma anketys daleibai festivala nūtikšonuos var atrast tuo sātys lopā.