Maja mieness Lūznovys muižā byus boguots ar pyrmajom reizem – pyrmū reizi 13. majā te tiks izdoncuota Kadriļu nakts i pyrmū reizi 21. majā muiža durovys taiseis Muzeju nakts apmaklātuojim, ļaunūt izbaudeit ceļojūšuo festivala “Vadātājs” pīturu ar naksneigu i latgalisku nūskaņu, informej muižys puorvaļdneica Iveta Balčūne.

13. majā 20.00 Lūznovys muiža aicynoj atsagrīzt muižys atkluošonys laikā 20. gs. suokuos i baudeit spūdrū ļaudyskū dzeivi, kurū iz paguojušuo godu symta suokom te vess Kadriļu nakts. Kadriļys īruodeis i doncuot aicynuos folklorys kūpa “Dandari” (Reiga), deju kūpa “Dziga” (Rēzekne), folklorys draugu kūpa “Vīteri” (Rēzekne). Kadriļu balu vadeis “bala maršals”, kurs dasaceis dejis i izskaidruos kotrys dejis izvesšonys kuorteibu. Bala dalinīki, apsavalkūt Kadriļu naktei, aicynuoti īvāruot 20. gs. suoku mūdis teņdeņcis. Īcarātuo bala nūrise saturiski turpynuos suoktū kadriļu doncuošonys vuiceišonuos i populariziešonys procesu, veidojūt deju pasuokumu Lūznovys muižā atbylstūši 20. gs. suoku ļaudyskū pasuokumu stilistikai, kai ari paleidzēs tyvuok īpazeit Kerbedzu dzymtys stuostu i atstuotū kulturviesturiskū montuojumu Latgolā. Dasasaceit balam var sevkurs interesents da 10. maja, rokstūt muiza@luznava.lv voi zvonūt 29390701.

21. majā Latvejā nūtiks tradicionaluo akceja Muzeju nakts, kuruos nūtikšonuos pyrmū reizi pīsadaleis ari Lūznovys muiža. Muzeju naktī Lūznovā varēs pīdzeivuot ceļojūšuo festivala “Vadātājs” pīturys muokslinīciskūs pīdzeivuojumus, ekskursejuos īsapazeit ar muižu i tuos ustobys viersā baudeit latgalīšu akustiskuos muzykys koncertu. Ceļojūšais festivals “Vadātājs” ir rodūšūs nūzaru kūpprojekts – izbraukuma pasuokums, kurymā vīnojās vysaidi muokslys i kulturys veidi. Lūznovā muižys i ceļojūšuo festivala “Vadātājs” moto, sasasaucūt ar ituo gods Muzeju nakts temu “Durvis” ir “Atver durvis uz MŪZU!”. Ceļojūšuo festivala pīturā Lūznovā apmaklātuojus gaida laikmeteiguos dejis izruode, dzejis i muzykys kūpprojekts, ansambļa “Manta” koncerts, Latvejis jaunūs režisoru eiskinu programa, kai ari pyrmū reizi apmaklātuojim “durovys taiseis” muižys ustobys vierss, kurymā apmaklātuojus prīcynuos akustiskais latgalīšu muzykys koncerts. Muzeju nakts durovu attaiseišona Lūznovā suoksīs nu 18.00 ar ekskursejom pa muižu, nu nūsaslēgs pusnaktī ar nakts zupys baudeišonu muižys parkā.

Kluotyn eipašajom maja nūtikšonom muižā da juņa beigu apsaveramys divejis lītaunīku komponista i gleznuotuoja Mikalojus Konstantina Čurļuoņa dorbu izstuodis ar kūpejū nosaukumu “Čurļoņa pasaule”. Izstuodēs apsaveramys muokslinīka dorbu reprodukcejis nu cykla “Pasaules radīšana” i fotografejis, kas dokumentej muokslinīka 1905. goda ceļuojumu iz Kaukazu – izstuodē “Anapa”. Taipat ari itūgod muižā interesentu apsavieršonai teik pīduovuota lela Latgolys pūdnīku dīnu ekspoziceja, kurymā apsaverami Latgolys pūdnīceibys meistaru pādejā laikā taiseitī keramikys trauki: kruošni glazātuo i niansem boguotuo reducātuo (malnuo) keramika, vyrpuoti i lepeiti trauki, kasdīnā lītojamuo i dekorativuo keramika.

Daleiba pasuokumūs ir bez moksys. Kadriļu nakts i ceļojūšuo festivala “Vadātājs” nūtikšonys atbolsta Vaļsts kulturkapitala fonds i Rēzeknis nūvoda dūme.

Apmaklātuoju īviereibai: reizē ar turisma sezonys suokšonūs nu 1. juņa tiks maineits Lūznovys muižys i Rēzeknis nūvoda turisma informacejis centra dorba laiks – muiža byus attaiseita apsavieršonai kotru dīnu nu 10.00 da 18.30.

Karteņa: Aleksandrs Tolopilo