24. maja pavasareigū vokoru grupa “Arcandela” aicynoj pavadeit muzykys i teatra restoranā “Happy Days & Nights” (Reigā, Martys īlā 10, 2. stuovā), kur 20.00 nūtiks grupys koncerts “Etno:France”.

Grupu “Arcandela” veidoj sešys dažaidys muzykys jūmys puorstuovūšys personeibys ar daudzveideigu profesionaluos muzykys bagažu – pianists Rihards Plešanovs, etnomuzikologis Liene Brence (vejūle) i Aiga Sprindža (vokals), džeza muzikis Tuoms Lipskis (kontrabass), folkmuzikis Rolands Zelčs (akordeons) i operdzīduotuojs Kārlis Saržants. Juopīmiņ, ka pīci grupys dalinīki ir latgalīši, kas pamatā dzeivoj Reigā. Ansambļa muzykalais bukets ir akademiskuos, džeza i tradicionaluos muzykys rodūšuo siņteze.

Koncertprogramā skanēs fraņču tautys deju – mazurku, burrē, skotišu i valšu senejī meļdeni “Arcandela” dalinīku originalajuos aranžejuos, kai ari cyti muzykali puorsteigumi. Itei koncertprograma ir breineiga vareiba muzykys gordiežim īsapazeit ar mozuok zynomū fraņču tradicionalū deju muzyku, kas bīži viņ palīk popularūs fraņču šansonu pakrieslī. Nanūlīdzami, francuži ir eisti jiutu eksperti i itei deju muzyka tam ir patīss pīruodejums.

Vaira informacejis par grupu var atrast jūs Facebook lopā.

Beleti iz koncertu īprīškpuordūšonā “Biļešu Paradīzes” kasēs voi škārsteiklā.