“Dabasu Durovys” klauseituojim nūdūd videoklipu dzīsmei ar Raiņa vuordim “Augstumā”.

“Augšā zilā debess aiztur elpu.” Tī ir Raiņa vuordi, kurim muzykalu skaniejumu pīškeiruse grupa “Dabasu Durovys”. “Vysleluokuo ceiņa cylvākam ir juoizceinej ar sevi. Tei ir golvonuo dūma – pavysam vīnkuorši,” par jaunū dzīsmi “Augstumā” soka grupys solists i dzīsmis muzykys autors Arņs Slobožanins.

Koč i Raiņa dzeja parosti skaņ smogi, Arņs soka, ka itys dorbs atguojs pavysam dabiski i ari skaniejums pīmāruots vīgls i nadaspīsts, nu vuordu viestejums, kai jau Raiņam – dziļš. Turpynojūt runojūšuo klusuma temu, kū jau īzeimiejušys gaidomuo albuma dzīsmis “Šūpuļdziesma” i “Pādys”, ari itamā stuosts ir par celim, kū izavielejam īt.

Jau augustā gaidomais grupas catūrtais studejis albums i desmitgade mudynoj vērtīs dziļuok sevī, atrast jaunus augstumus i ceļus. Pyrmatskaņuojumu dzīsme “Augstumā” pīdzeivuoja “Dabasu Durovu” Muzeju Nakts koncertprogramā Bolvūs, Rēzeknē i Maltā.

Īrokstā pīsadaleja: Aleksandrs Tamans (bungys, marimba, metalofons), Laura Bicāne (akordeons), Romāns Sladzis (bolss), Valdis Rundzāns (bass), Arņs Slobožanins (bolss, gitara).

Dzīsmis īroksts radeits Daugovpilī, Custom Rd studejā. Miksēja – Armands Treilihs. Videoklipa autors ir Ivars Utināns (Ivo Productions).