10. juņa vokorā nu 18.00 jau trešū godu nūtiks Bazneicu nakts, kurymā cylvāki teik aicynuoti īpazeit Latvejis bazneicu kulturys i goreigū montuojumu. Itūgod nūtikšonā pīsadaleis 190 Latvejis bazneicys, ari 13 Latgolys dīvnomi.

Bolvu Vyssvātuokuos Treisvīneibys katuoļu bazneicā paradzāta rodūšuo darbneica “Smilšu kino”, piečuok byus ari goreiguos muzykys koncerts, kai ari nūtikšonys Bolvu Sakraluos kulturys centrā. Eipašs nūtykums Bolvūs byus kristīšu gaismys guojīņs nu Bolvu Evangeliski luteriskuos iz Rūmys katuoļu bazneicu, kas paradzāts 20.40.

Daugovpiļs Sv. Pītera kēdēs katuoļu bazneica paradzāta ekskurseja, Svātais Mišs, kai ari kūpeigys lyugšonys.

Kuorsovys Augšamceļšonuos evangeliski luteriskajā bazneicā byus vareiba redzēt video projekceju par bazneicys i Kuorsovys viesturi, īsapazeit ar bazneicu ekskursejā, kai ari kūpā lyugtīs i klauseitīs koncertu “Skaņu dārzs”.

Mežavydu Skapulara Dīvmuotis katuoļu bazneicā nūtiks Svātais Mišs, koncerts, kai ari lyugšonys i dzīsmis pi gunkura.

Leivuona evangeliski luteriskajā bazneicā paradzāta ekskurseja, rodūšys aktivitatis, lyugšonys, kai ari koncerts varganistis Maijis Kleščevskys vadeibā.

Nīdermuižys Kunga Jezus Apskaidruošonys katuoļu bazneicā nūtiks Svātais Mišs, varēs īsapazeit ar bazneicys cāluoja prīstera Andžijevska biografeju, kai ari vokora nūslāgumā paradzātys bazneicu nakts vakarenis i folklorys kūpu koncerts.

Lūznovys muižys kapelā Bazneicu nakts nūtikšonys suoksīs ar diskuseju “Latviskā dzīvesziņa un kristīgās vērtības”, kurymā pīsadaleis Rēzeknis Tehnologeju akademejis filologejis doktore Angelika Juško-Štekele, Leivuona draudzis pravests Jurs Zarāns i Rēzeknis Jezus Sirds draudzis vikars Vitālijs Fiļipenoks. Piečuok paradzāts trio “Voice of Instruments” (Reiga) koncerts, kurymā izskanēs eipaša muzykaluo programa bazneicom, vokora izskaņā kapelā nūtiks Svātais Mišs.

Varakļuonu evangeliski luteriskajā bazneicā byus rodūšys darbneicys bārnim i pīaugušajim, ekskurseja pa bazneicu i īsapazeišona ar tuos viesturi, kūpeigys lyugšonys, kai ari koncerts.

Viļakys evangeliski luteriskajā bazneicā varēs izzynuot vaira par tuos viesturi, nūtiks ari koncerts i kūpeigys lyugšonys par Latveju.

Škilbānu Suopu Dīvmuotis katuoļu bazneicā pasuokums tiks suokts ar rodūšuom darbneicom lelim i mozim, piec tam byus Svātais Mišs, piec kura paradzāts Laurys Bicānis koncerts. Piec koncerta nūtiks guojīņs “Lūgšanu ceļš”.

Bazneicu naktī pīsadaleis ari Baļtinovys Kunga Jezus Kristus pasludynuošonys katuoļu bazneica i Augustovys Sv. Elizabetis katuoļu bazneica, nu par tūs programu vaira var izzynuot iz vītys bazneicuos. Nu zynoms, ka Baļtinovā 21.15 paradzāts Laurys Bicānis koncerts.

Vaira par Bazneicu nakts nūtikšonom var izzynuot pasuokuma sātys lopā.