Latvejis Radejis Latgolys multimedeju studeju vadeis Renāte Lazdiņa
Latvejis Radejis Latgolys multimedeju studeju Rēzeknē vadeis Renāte Lazdiņa, nu par korespondenti struoduos Lāsma Zute, informej Latvejis Radeja.
Konkursā iz Latgolys multimedeju studejis darbinīku omotim tyka sajimti seši dasacejumi studejis vadeituoja vītai, kai ari deveni dasacejumi iz korespondenta vītu.
Lazdiņa īprīkš struoduojuse par uorštata žurnalisti laikrokstūs “Diena”, “Lauku Biznesa Laikraksts”, žurnalūs “Māja. Dzīvoklis” i “Apelsīns”, kai uorštata žurnaliste veiduojuse materialus Latvejis Radejis raidejumim “Kolnasāta”, “Kultūras Rondo” i Nūvodu ziņom.
Jei ari bejuse projektu vadeituoja, producente i redaktore dažaidūs medeju projektūs Latgolys regionā – raidejumu cyklam “Pi myusim Latgolā” Latgolys Radejā, radejā “Ef-Ei”, “Divu krastu radio”, radejā “Marija Latvija”.
Paradzāts, ka studeja sovu dorbu suoks juļa suokuos.
Vysupyrma Latgolys studejā radeitī informacejis sižeti par Latgolys aktualitatem tiks īkļauti vysu kanalu ziņu izlaidumūs – Latvejis Radejis 1 ziņu i kulturys raidejumūs, Latvejis Radejis 2 Nūvodu ziņuos, kai ari Latvejis Radejis 3 i Latvejis Radejis 4 reita programuos.
Paradzams, ka rudinī Latgolys studeja suoks pīduovuot ari tīšraidis i pastuoveigi veiduotus diskuseju raidejumus par Latgolys kulturu, intervejis ar redzīņu liderim, kai ari cyta veida saturu.
