Rēzeknis nūvoda pošvaļdeibys foaje (Atbreivuošonys alejā 95A, Rēzeknē) vysu juni apsaverama fotoizstuode “Latgales ainavas”, kū pīduovoj Daugovpiļs fotostudeja “Ezerzeme -F”, informej nūvoda sātyslopa. Izstuodē izvītuoti i breineigi Latgolys dobys skoti, i natradicionalys i puorsteidzūšys fotošaļtenis, kuruos givuse fotografa kamera.

Izstuodē ar sovim dorbim pīsadola fotografi Ivars Skudra, Linards Onzuls, Olga Petrova, Genādijs Lins, Jurijs Berdņikovs, Anatolijs Kivrins, Viktors Savčenko, Jurijs Dunaiskis. Fotostudeja “Ezerzeme – F” apvīnoj cylvākus, kas nav vīnaļdzeigi pret fotografeju: i profesionalus fotografus, i amaterus. Fotostudejis vadeituojs ir Linards Onzuls. Rodūšais kolektivs aktivi pīsadola konkursūs, tematiskajuos i personalizstuodēs. Dorbu izstuodis ir bejušys i Latvejā, i aiz tuos rūbežu.

Kai stuosta izstuodis iniciators Rēzeknis fotokluba “ARTērija” vadeituojs Eduards Medvedevs, Rēzeknis fotoklubs jau vairuokus godus sasadorboj i draudzejās ar Daugovpiļs fotoklubu “Ezerzeme-F”, reikojūt kūpeigys izstuodis i Daugovpilī, i Rēzeknē, kai ari reikoj ceļojūšys kūpizstuodis.

Fotoizstuodis Rēzeknis nūvoda foaje ir palykušys par lobu tradiceju — sagaidūt Rēzeknis nūvoda dīnu, julī byus apsaverama fotoizstuode “Novada ļaudis”, kas veiduota nu 2015. goda majā nūtykušuo J. Gleizdam veļteituo fotoplenera dorbim.