13. augustā 19.00 Latgolys viestnīceibys GORS lelajā zalā nūtiks postfolklorys grupys “Rikši” koncerts “Sieju sovu”, informej latgalesgors.lv.

Grupys koncertā gaidoma i īrostuo akordeona, vejūlis, gitarys, basgitarys, bubyna i 5 bolsu radeituo azartiskuo energeja i jautreiba, i jaunys vāsmis, idejis i jaunu ceļu vaicuojumi. Tys vyss car jūkim, stuostim i, prūtams, vacom i jaunom postfolklorys grupys “Rikši” dzīsmem. Ari itymā “Rikšu” koncertā gaidomi grupys draugi kai gosti: folklorys kūpa “Rūta”, folklorys draugu kūpa “Vīteri” i postfolklorys grupa “Dārdi”.

Postfolklorys grupa “Rikši”, kuruos vacums ituo gods 14. janvarī beja atzeimuojams pusopolā jubilejā, 2015. goda suokuos izdūmuoja dasavērst Rēzeknis tradicionalajam repertuaram. Pyrma tuo ļusteigys i energiskys dzīsmis dzīduotys i spālātys i latgalīšu muzykys festivalūs “Muzykys skrytuļs”, i folklorys festivalā “Baltica”, Latgolys Dzīšmu svātkūs i XXV Vyspuorejūs latvīšu Dzīšmu i Deju svātkūs, taipat ari Lītovā, Krīvejā, Fraņcejā, Vuocejā i Gruzejā, kai ari naskaitamūs koncertūs, festivalūs i svātkūs vysā Latvejā. Laikam eimūt, nadaudz pasamainejs grupys sastuovs, grupa pylnveiduojuse i atsateistejuse, pasamainejs ari dalinīku redzīņs par sovu dorbuošonūs i atbiļdeibu pret tautys vierteibom, ar kuruom teik struoduots. “Rikšu” dūmys napuortrauktai mejās ap vuordim “Sieju sovu” – kas ir tys, kū mes varam sēt (homoformys sakriteibys dieļ – ari sīt), kai mes tū varam sēt/sīt i kai sēt tū tai, kab latgalīšu tautysdzīsme tyktu dzīduota ari piec … godu. Grupys ūtrajam albumam, kurymā 10 “Rūtas” īdzīduotuos dzīsmis aranžātys “Rikšu” dalinīku redzīnī, dūts taišni taids nūsaukums – “Sieju sovu”.

Projektu “Sieju sovu” atbolsta SIA “Auto flora”, LaKuGa i Rēzeknis nūvoda dūme.