Preiļu nūvoda dūme, Latvejis fotografu asociaceja i Latgolys fotografu bīdreiba aicynoj fotografus i foto entuziastus pīsadaleit seminarā, kas paradzāts 23. julī 10.00 – 17.00 Preiļu kulturys nomā, informej Latgolys fotografu bīdreibys vaļdis prīšksādātuojs Igors Pličs.

LaKuGa jau viesteja, ka Latgolys planavuošonys regions i Latgolys fotografu bīdreiba ir izsludynuojuse fotokonkursu “Latgalietis XXI gadsimtā”, kuruo mierkis ir izveiduot Latgolys nūvoda cylvāku karteņu kolekceju, kurei atkluotu regiona sovpateibu, tai boguotynojūt nūvoda viesturis arhivu ar aizejūšuo laika līcinīku attālim tūs dabiskajā vidē. Nu konkursā sajimtajim materialim paradzāts izveiduot izstuodi, kai ari lobuokūs dorbus vierzeit īkļaušonai kūpejā Latgolys fotoalbumā, kas byutu veļtejums Latgolys kongresa symtgadei.

Turpynojūt lobū praksi foto aktivitatēs, saisteibā ar konkursu teik reikuots seminars, kuram ir izgleitojūšs, aktivitatis rūsynojūšs i kvalitativu fotografeju īgiušonai vierzeits mierkis.

Seminarā byus vairuoki lektori (viesturnīki, filologi, muokslinīki, fotografi i cyti specialisti), kurī runuos par tū, kaids varātu izavērt Latgolys cylvāks XXI godu symtā fotografiskys tehnikys izpiļdejumā. Varēs dzierdēt vairuokus redzīņus (ari atškireigus), kurūs rezultatā byus vareiba boguotynuot zynuošonys fotografejis jūmā i sajimt īdvasmu tuoluokajam dorbam – foto pleneru, konkursu i izstuožu organiziešonai sovūs nūvodūs. Seminarā tiks runuots ari par tūpūšuo izdavuma nūzeimi i mierkim. Dasasaceit aicynuoti ari cyti lektori, kas grybātu uzrunuot klauseituojus par Latgolys cylvāka portreta tematiku.

Dalinīki aicynuoti dasacejumus ar pavuordem i telefonu numerim breivā formā da 10. juļa syuteit iz e-postu lauraplus@inbox.lv voi zvaneit 29121689.