Jau septeitū godu vairuokuos Latgolys katuoļu bazneicuos laikā nu 15. da 31. juļa Latgolys vargaņu dīnu festivala ītvorūs byus vareiba baudeit ostoņus augstys kvalitatis koncertus, informej festivala sātyslopa.

Pasasokūt festivalam jau niule ir īvāruojami izalobuojs Latgolys bazneicuos asūšūs vargaņu tehniskais stuovūklis, vys skaidruok cylvāki suok apsazynuot ituo instrumenta vierteibu i vajadzeibu tū atbiļsteigi uzturēt. Taipat festivala mierkūs ītylpst vargaņspēlis kulturys i latvīšu vargaņmuokslys populariziešona, jaunūs varganistu īdvasmuošona. Kotru godu kaidam nu jaunajim talantim teik padūta Veicynuošonys bolva.

Latgolys vargaņu dīnys ir lobdareibys projekts – īīšona vysūs koncertūs ir par zīduojumim. Itūgod festivala koncertūs savuoktī zīduojumi tiks nūvierzeiti  Kuorsovys bazneicys vargaņu restauracejai.

Latgolys vargaņu dīnu 2016  eipašuo gaška byus varganiste asoc. prof. Larisa Bulava. Taipat festivalā uzastuos ari cyti profesionali varganisti: Diāna Jaunzeme, Ilona Birgele, Iveta Pelše, Juoņs Pelše, Larisa Carjkova, Guna Kise, Jacinta Ciganoviča, Amanda Vingre, S. Broka Daugovpiļs Muzykys vydsškolys, J. Ivanova Rēzeknis Muzykys vydsškolys, Kuorsovys Muzykys i muokslys školys, Aglyunys bazilikys Kora školys audziekni, kai ari solisti – Monta Martinsone, Jolanta Strikaite-Lapiņa, Laura Bicāne, Ilze Grudule, Ilze Grēvele, Andrejs Grimms, Evita Zālīte, Īva Akuratere, Ilze Grunte, Gunta Greisle, Juoņs Zeps, Zane Kurme, Guntra Kuzmina i vokaluo studeja “Skonai”.

Pasasokūt video projekcejai, koncertūs varganistu spēli varēs redzēt tyvplanā. Kai ari, turpynojūt tradiceju, piec koncertu interesentim byus vareiba redzēt instrumentu demonstriejumus, aizdūt vaicuojumus varganistim i paraudzeit sovus spākus, īsajiutūt varganista lūmā.