23. julī Ančupānu līknē nūtiks kasgadejuo Rēzeknis nūvoda dīna – aizraujūši, izzynūši i sportiski svātki vysai saimei, informej Rēzeknis nūvoda sātyslopa. 

Nu 12.00 basketbola spēlis mīļuotuoji varēs nūskaidruot lobuokū komandu strītbola saceņseibuos, sovukuort 14.00 jau ūtrū reizi nūtiks saceņseibys “Rēzeknes novada stiprākais lauku vīrs – 2016”. Kab tyktu pi vysa nūvoda stypruokuo veira gūda, pogostu stiprinīkim sovs spāks i iztureiba byus juopuorbauda vysvysaiduos disciplinuos, par pīmāru, traktora rīpys veļšonā, bolkys ceļšonā, dziernovu akmiņa nesšonā i cytur. Tikom mozī stiprinīki sovu izveiceibu varēs puorbaudeit “Piedzīvojumu takā”, kur atrakcejis i stafetis bārnim pīduovuos bīdreiba “Par stipru ģimeni”.

Turpynojūt jau vairuokus godus aizsuoktū “Pagastu dižošanās” tradiceju, ari itūgod nu 15.00 Rēzeknis nūvoda pogosti ruodeis, ar kū tī ir stypri i boguoti. Pogostu īlā byus i omotnīku paraugdemonstriejumi, i rodūšuos darbneicys, i muokslinīciskuos pošdarbeibys kolektivu prīšknasumi, i kulinarais montuojums. Kai īrosts, vysys dīnys garumā apmaklātuojus gaideis ari omotnīku tierdzeņš.

17.00 ar koncertu “Manas mājas dzimtā novadā” suoksīs svātku muzykaluo daļa i tiks gūdynuotys Rēzeknis nūvoda stypruokuos i talanteiguokuos saimis. Piec svātku koncerta ļuste turpynuosīs nakts balā – nu 18.30 da pošu reita gaiļu sevkurs ir aicynuots ļusteigi izadoncuot kūpā ar desmit muzikim i grupom. Iz diveju skotuvu spielēs Intars Busulis, “Menuets”, “Otra Puse”, “Laimas Muzykanti”, “Dabasu Durovys”, “Ginc & es”, Voiceks Voiska, “Kapļi” i cyti Latvejā zynomi muziki.

Īīšona iz vysim pasuokumim – breiva.