Juļa beiguos nūtiks Dagdys nūvoda goda leluokais pasuokums – “Annas Dagdā 2016”.

Itūgod svātki nūtiks treis dīnys – nu 29. da 31. juļa. Svātkus īskandynuos pīktdiņ “Tierga dīnā” ar tradicionalū omotnīku godatiergu, kuruo laikā nūtiks nūvoda saimineicu sasatikšona i iedīņu degustacejis “Vysi muni gosti beja”. 12 stuņdēs pi nūvoda dūmis suoksīs pasuokums “Latvijas spēcīgākā pilsēta”, kurymā sevkurs varēs pīruodeit, ka Dagdys nūvodā dzeivoj sportiskuokī i stypruokī dzeivuotuoji. Sovukuort 15.00 nūtiks stypruokūs apbolvuošona. Vokorpusē piļsātys centralajā laukumā iz izruodi “Limuzīns Jāņu nakts krāsā” aicynuos Ezeris kulturys noma amatīrteatris “Meduspods”, nu Dagdys Tautys nomā nūtiks diskoteka, kurymā muzyku liks DJ Dinny, DJ Shvec i DJ Alex.

Sastdīnē aba “Svineibu dīnā” Dagdys muižā nūtiks zyrgu rikšuotuoju saceņseibys. 16.00 pi Veseleibys i socialūs pakolpuojumu centra “Dagda” izastuos nūvoda pošdarbeibys kolektivi. Dagdys parka estradē 20.00 nūtiks Lelais svātku koncerts, piec tuo iz skotuvis kuops Latvejā popularais i īmīļuotais dzīduotuojs Roberto Meloni ar grupu. Vokora turpynuojumā nūtiks zaļumbals ar grupu “Kā gribat”.

Svātdiņ “Iudiņa dīnā” vysi teik aicynuoti baudeit iudiņa prīcys Dagdys jaunajā pludmalē Jelgovys īlā. Jau nu 13.00 nūtiks vysaidu iudiņa atrakceju paraugdemonstriejumi, kuruos vāluok sevkurs varēs ari izmieginuot.