9. julī Aglyunys nūvods aicynuoja dalinīkus i gostus iz XV Latgolys nūvodu senioru dzīšmu i deju festivalu “Dziedot dzimu, dziedot augu…”.

Itymā pasuokumā pīsadaleja 71 pošdarbeibys kolektivs ar apmāram 900 dalinīkim nu 16 Latgolys regiona nūvodim – Bolvim, Dagdys, Daugovpiļs, Īlyukstis, Kuorsovys, Kruoslovys, Leivuona, Ludzys, Preiļu, Rēzeknis, Rībeņu, Ruguoju, Vuorkovys, Viļakys, Viļānu i Aglyunys.

Pi Aglyunys Maizis muzeja nūtyka īlys koncerts i godatiergs. Tod senioru bīdreibu i pošvaļdeibu puorstuovi tyka aicynuoti iz pījimšonu i sasatikšonu ar Aglyunys nūvoda pošvaļdeibys vadeibu, kas tyka reikuota Aglyunys vydsškolys aktu zalā. Pasuokumā tyka sveikti pošdarbnīku kolektivu i pensionaru bīdreibu vadeituoji, padūtys pateiceibys i nalelys pīminis zeimis.

Vāluok daudzi kolektivi pīsadaleja Svātajā Mišā Aglyunys bazilikā, tod vysi devēs svātku guojīnī da Aglyunys breivdobys estradis, kur nūtyka festivala svātku koncerts. Kotrys kolektivs ar sovu karūgu prīškā izacēle ar kruošnim tārpim i rūtom.

Festivala koncertā uzastuoja Latgolys nūvodu kori, vokalī ansambli, folklorys kūpys, deju kolektivi. Latgola ir boguota ar sovom daudzveideiguom  pošdarbeibys  tradicejom. Mozuokumtauteibu kolektivi izpiļdeja dzīsmis krīvu, boltkrīvu, pūļu i ukraiņu volūduos.

Piec koncerta Latgolys nūvoda senioru dzīšmu i deju svātku karūgs tyka svineigi nūdūts Leivuona nūvoda dūmis prīšksādātuojam, kur cytugod nūtiks jau XVI Latgolys nūvodu senioru dzīšmu i deju festivals.