Nu 19. da 21. augusta Preili aicynoj svieteit nūvoda svātkus, sajimt pozitivys emocejis i treis dīnu garumā baudeit kruošņys vosorys izjiutys pasuokumūs vysaidom gaumem, informej Preiļu nūvoda sabīdryskūs attīceibu specialiste Maija Paegle.

Svātku ītvorūs nūtiks 2. storptautyskais Leļu festivals “Leļļu vasara Preiļos”. Uzaicynuojumam pīsadaleit festivalā itūgod atsasaukuši 32 muokslinīki nu 10 vaļstu. Jūs vydā storptautiski atzeiti leļu autori nu Igaunejis, Lītovys, Krīvejis, Boltkrīvejis, Latvejis, Vuocejis, Izraelys, Nīderlandis, Italejis i Ukrainys.

Festivala ītvorūs treis dīnu garumā Preiļu kulturys nomā nūtiks autorleļu izstuode, Preiļu Muzykys i muokslys školys telpuos dorbuosīs meistarklasis bārnim, nu festivala nūslāguma dīnā izlūzē tiks nūsaceiti apmaklātuoji, kurī byus īsaguoduojuši laimeigūs beletus i sajims leļu meistaru dorbus.

19. augustā pasuokuma programa suoksīs ar Gruomotu svātkim, dorbuosīs Vaļsts rūbežsardzis koledžys informativuo telts, literarūs skaitejumu breivais mikrofons. Dīnys ūtrajā pusē byus apsaverami īlu deju paraugdemonstriejumi, nūtiks rodūšuos darbneicys bārnim, Preiļu parka estradē nūtiks kuortejais Latvejis spākaveiru čempionata pūsmys, nu vokorā – Jaunīšu vokors disko ritmūs ar muzykys grupom Makree, “Dvīnes”, “Bandmaster”, “Olas”.

Sastdiņ, 20. augustā, Raiņa bulvarī pierkt i puordūt grybātuoji tiks gaideiti Tierga īlā. Vysys dīnys laikā byus koncerti vysom paaudzem – uzastuos Preiļu nūvoda tautys muokslys kolektivi, postfolklorys grupa “Rikši”, saimis ar bārnim prīcynuos muzykali teatrala izruode “Svētki Brīnumskapī”, puorejim – muzykys grupys “Dricānu Dominante” koncerts.

Byus ari vysaidys aktivitatis i informativi pasuokumi – NVA Preiļu filialis i Preiļu Golvonuos bibliotekys konsultativuos telts, Latgolys tradicionalūs iedīņu meistarklasis i degustaceja. Sastdiņ agri nu reita iz saceņseibom sasapuļcēs zyvu givieji, vāluok piļsātys pludmalē nūtiks pludmalis volejbola i futbola turniri, Lobdareibys bumbu rallijs. Sevkurs aicynuots pīsadaleit kruošņā Svātku guojīnī, kab piec tam Preiļu parka estradē pīsadaleitu konkursa “Sakoptākais īpašums Preiļu novadā” uzvarātuoju apbolvuošonā, sajimtu emocionalu baudejumu Intara Busuļa i “Abonementa orķestra” koncertā i kūpā ar grupu “Galaktika” doncuotu zaļumbalā.

Svātdiņ, svātku trešajā dīnā, nu poša reita nūtiks svineigs dīvkolpuojums Preiļu vacticeibnīku bazneicā, vāluok – svātku dīvkolpuojums i Preiļu nūvoda školuotuoju kora “Latgale” koncerts Preiļu Rūmys katuoļu draudzis bazneicā.