Aglyunā nūtiks pasuokums “Ar veļiku pa Aglyunu 2016”
27. augustā Aglyunys nūvoda bīdreiba “Neaizmirstule” i Aglyunys pogosta dzeivuotuoju iniciativys grupa “Velomīļi” aicynoj velobrauciejus gostūs iz Aglyunu.
Pasuokumā “Ar veļiku pa Aglyunu 2016” sevkurs varēs pīsadaleit veloparadē pa Aglyunys īlom, maratonā – tautys trasis distaņcē (15 km), sporta trasē (velobrauciejim ar pīredzi – 30 km). Mozī velobraucieji teik aicynuoti sovus spākus izmieginuot škieršļu jūslys puorvariešonā, kai ari sasaceņst kombinātajā stafetē (mauduošona, airiešona, velotrials). Dalinīkim juodasasoka da 26. augusta 15.00 elektroniski voi telefoniski: iaglona@inbox.lv; t. 29285185.
Velomaratona trase byus i pa asfaltātu, i grants ceļu, meža celenim i stygom. Saceņseibys nūtiks individuali i komanduos. Velodīnys izskaņā tiks sveikti uzvarātuoji, mozi i leli veiksmeiguokī pedalu minieji. Ar sovu velošovu prīcynuos KARTERS komanda. Sovukuort zaļumbalā sevkurs varēs izaprīcuot da pošys reitausmys.
