Lūznovys muižā aizvadeits pyrmais Muokslys pikniks
24. julī Rēzeknis nūvoda Lūznovys muižā i tuos parkā nūtyka pyrmais Muokslys pikniks, kurymā vysys dīnys garumā puļcejuos ap 1200 tyvuoku i tuoluoku apmaklātuoju, pīdzeivojūt vysaidys muokslys, muzykys, dejis, kinys i garšu meistarklasis, prīšknasumus i baudys, informej muižys kulturys projektu vadeituoja Inga Drele.
Koč i nu poša reita laikapstuokli naīprīcynuoja, tok piecpušdīne Lūznovys muižys parkā guoja ar sauli i svātdīne saguoja tik breineiga, cik viņ varēja byut. Muokslys piknika programa Lūznovys muižys parkā suocēs jau vīnūs dīnā, kod te eipaši gaideitys beja saimis ar bārnim – akmisteņu apgleznuošona, sveču līšona, vaiņuku veišona, festivala 2ANNAS bārnu i saimis kinu programa, blīnu veiduošona sītspīdē i cytys aktivitatis gaideja mozuokūs piknika apmaklātuojus. Bārnu i saimu atsauceiba darbneicuos i meistarklasēs beja tik lela, ka cytai reizei secynuots – programa, kas dūmuota bārnim, nūteikti juopaplašynoj i juopīduovoj da poša vokora.
Piknika muokslys programu atkluoja jauns kūpprojekts – Rēzeknis klezmeri i jaunī talanti “The Jokers Juniors”, kurī kūpeigā koncertprogramā prīcynuoja saguojušūs ar klezmeru muzyku. Balkona skotuvis programu dīnys laikā turpynuoja grupa “The Weird Wednesdays”, Liene Narcis, “Ave Jah Bahus trio”, nu vokorā nūslēdze legendarais dzīsminīks Haralds Sīmanis. Parka skotuvis koncertprogramu atkluoja magisks Elizabetys Lācis arfys koncerts, turpynuoja jaunī i energiskī “The Coco’nuts”, džeziski īskandynuoja “Pieneņu Vīns”, nu iz čyuskeglis scenografejā rūtuotuos skotuvis kai pādejī kuope grupa “Dzelzs Vilks”, kurī piknika apmaklātuojus prīcynuoja ar akustiskū programu. Uora koncertu nūrise i pīmāruotuo infrastruktura pasuokuma organizatorim raiseja idejis, ka vosorys uora koncerti varātu palikt par regularu pīduovuojumu Lūznovys muižys apmaklātuoju prīcai.
Vysys dīnys garumā Lūznovys muižā i vēļ vaira parkā varēja just muokslys kluotbyutni – muokslys dorbu radeišona ocu prīškā, palikšona pošim par muokslys dorbu varūnim, muokslys izstuodis i objekti caurvyna vysu Muokslys piknika nūrisi. Vysaiduos parka vītuos ar sovim molbertim ārtai īsakuortuojušys beja muokslineicu apvīneiba V.I.V.A i muokslineica Inga Onževa, gordiežu zonā apmaklātuoju portretus zeimēja Leiga Grāvele, piknika zonā dizaina darbneica “Valis” stencilu tehnikā veiduoja Lūznovys muižys fotosīnu, nu muorka molā napīkuss rūsejuos muokslinīks Gundars Kozlovskis, kurs taiseja syltumneicys efekta temai veļteitu guņs skulpturu, kuruos īdegšona nūslēdze Muokslys piknika programu eisai pyrma pušnakts. Taišni muokslys nūrisis ļuove vēļ vaira īpazeit Lūznovys muižys apbyuvē asūšūs kuormus – ar vīnu najaušu, iz vacuos školys sīnys izkuortu gleznu tyka radeita vasala V.I.V.A gleznu izstuode, pogrobā bīdynojūši, nu reizē ari meili īsakuortuojuši beja muokslineicys Anastasejis Dubovskys nakts gori, muižys klietī, apsavīnojūt vaira par desmit Latgolys muokslinīkim, beja īkuortuota vasala muokslys galereja ar gaismys objektu izstuodi i izstuodi “Tautumeita”.
Muokslys piknika organiziešonā Lūznovys muižai izaveiduoja ari breineiga kūpā dorbuošonuos ar jaunim sadarbeibys partnerim – kim? Laikmeteiguos muokslys centru, Storptautyskū kinu festivalu 2ANNAS, ar kurīm kūpā tyka radeita breineiga kinu programa, kas beja baudama speciali veiduotajā kinys teltī, i laikmeteiguos dejis horeografim, turpynojūt ari Latgolā pīduovuot vareibu īsapazeit ar myusdīnu muokslys nūtikšonom, kas bīži viņ pīdzeivojamys viņ Reigā. Taišni laikmeteiguo deja Muokslys piknika dīnā beja golvonuo Sorkonuo zala dzeivuotuoja ar divejom dejis izruodem, tok leluokū pīdzeivuojumu radeja dejis izruode “Ekskursija”, kuruos nūtikšona suocēs ar sasapuļciešonu pi muižys, nu turpynuojuos ar “objektu apsavieršonu” Lūznovys vacajā stadionā.
Naiztryukstūša sevkura piknika sastuovdaļa nūteikti ir iesšonys prīcys, kuruos beja ari Muokslys piknika svātdīnē. Pasuokuma organizatori prīcojās, ka aktivi tyka izmontuota eipaši veiduotuo piknika zona. Par gordumim i tūs veiduošonys meistarklasem pasaryupēja ari Spānejis, Portugalis i Fraņcejis povori, baudeišonai tyka pīduovuota zupa Kerbedzu gaumē, Varakļuonu deserti, blīni, nu dīna nūsaslēdze ar “Pērtnieku gardumu” reikuotuom Gordiežu vakareņom. Koč ari daži apmaklātuoji atzyna, ka lobpruot byutu prīcuojušīs par vareibu iz vītys nūpierkt vaira ādamlītu, tok pasuokuma reikuotuoji cer, ka preteji vyspuorejom pasuokumu nūtikšonu tendeņcem, taišni pošu leidza pajimtūs piknika grūzu baudeišona varātu palikt par eipašū Muokslys piknika tradiceju.
Kartenis: Olga Belova
