11. augustā 14.00 piec restauracejis dorbu pabeigšonys svineigi tiks atkluota Ludzys Leluo sinagoga, viestej Ludzys nūvoda sātyslopa. Programā ir paradzātys svineigys uzrunys i ebreju kūpīnu organizāts koncerts laukumā pi sinagogys.

Tei ir vacuokuo sinagoga Latvejā i Baļtejis vaļstīs i skaitama par unikalu zīmeļaustrumu Eiropys ebreju kulturys pīminekli, taidi cytur Eiropā pagaisuši 20. godu symta laikā. Objektam sasaglobuojs originalais veidūls, fasažu arhitektoniskuo kompoziceja, kūka pamatkonstrukceja, planuojums, interjers i īkuortys. Ludzys Lelajai sinagogai ir lela i unikala kulturviesturiskuo nūzeime.

Restauracejis dorbi nūtyka i uorpusē, i īškpusē, saglobojūt kuorma autentiskumu i eipašu viereibu dagrīžūt kūka detaļu saglobuošonai i restauracejai.

Atjaunuotajā sinagogā ir izveiduotys četrys ekspozicejis: ebreju dzeivis i ticeibys ekspoziceja; Ludzys ebreju viesturis audiovizualuo ekspoziceja (tamā īkļautys Ludzys piļsātys i tyvuokūs apdzeivuotūs vītu ebreju viesturis līceibys: ebreju dzymtu dzeivisstuosti, atsevišku cylvāku liktiņu atspīgeļuojums); fotografa Vulfa Franka i kinodokumentalista Herca Franka dorbu multimedialuo ekspoziceja (tei izveiduota, īkļaunūt slovonuokuo Ludzys fotografa, rodūšuo meistara Vulfa Franka i juo dāla, pasauļslovonuo kinodokumentalista Herca Franka dzeivis, saimis, rodūšuo dorba retrospekceju); Ludzys geto ekspoziceja (tei emocionali sasasauks ar memorialu nūvuovātajim ebrejim, kas atsarūn tīpat natuoli nu sinagogys).

Pabeigta ari ekspoziceju izveidei vajadzeiguos sinagogys īkuortys i mebeļu restauraceja.

Sinagogys restauracejis dorbus veice SIA “Warss+”, byuvuzraudzeibu nūdrūsynuoja SIA “Jurēvičs un Partneri”, autoruzraudzeibu – SIA “Konvents” pīredziejušuo arhitekta Pītera Blūma vadeibā.

Projektu “Ludzas Lielās sinagogas restaurācija un ebreju garīgā mantojuma atdzimšana” Ludzys nūvoda pošvaļdeiba eistynuoja Eiropys Ekonomikys zonys finanšu instrumenta Programma LV04 “Kultūras un dabas mantojuma saglabāšana un atjaunināšana” ītvorūs. Projekta partners ir Hordalandys Muzeju centrys (Norvegeja), tam ir pīredze kūka kuormu i detaļu restauracejis dorbūs.

Ludzys Leluo sinagoga iz prīšku dorbuosīs kai Ludzys nūvodpietnīceibys muzeja strukturvīneiba.

Kartenis autore: Svetlana Rimša (ludza.lv)