Daugovpiļs Marka Rotko muokslys centrys pīduovoj vareibu da 14. oktobra Daugovpiļs nūvoda kulturys centrā apsavērt muokslineicys Silvys Linartis personalizstuodi “Redzējums”.

Daugovpiļs Marka Rotko muokslys centra kolekcejā ir 14 muokslineicys kompozicejis, kas datiejamys ar laika pūsmu nu 2008. da 2015. goda.

Muokslineica ir 2008. goda Storptautyskuo simpozeja “Mark Rothko 2008” dalineica i nu 2013. goda – Daugovpiļs Marka Rotko muokslys centra Storptautyskuo gleznīceibys simpozeja žurejis lūcekle.

Izstuode Daugovpiļs nūvoda kulturys centrā teik organizāta kai pasuokums Storptautyskuo simpozeja “Mark Rothko 2016” ītvorūs, kuruo laikā, 18. septembrī, simpozeja dalinīkim i cytim interesentim nūtiks sasatikšona ar muokslineicu, runojūt par gleznīceibu, Rotko i redziejumu muokslā.

Silva Linarte ir dzymuse Daugovpiļs nūvoda Leiksnys pogostā. Bierneibu pavadejusi izsyutejumā Krasnojarskys nūvodā Krīvejā. Piec atsagrīsšonys Latvejā absolvējuse Reigys Lītiškuos muokslys vydsškolu, kai ari Muokslys akademeju, sajamūt pedagogis i gleznuotuojis kvalifikaceju. Struoduojuse Reigā, nu piec vaļsts naatkareibys atjaunuošonys atsagrīzuse dzeivuot Daugovpiļs nūvodā.

Muokslineica aktivi gleznoj, pīsadola izstuodēs Latvejā i uorzemēs. Sareikuotys vaira par 15 personalizstuodem. Muokslineicys dorbi globojās daudzuos privatkolekcejuos ASV, Vuocejā, Kanadā, Bermudu soluos, Kīnā, Zvīdrejā, Norvegejā.

“Bez gleznuošonys dzeive byutu garlaiceiguoka,” tai soka muokslineica, i tys patīsai apstyprynoj padareitū i ari tuoļuok doromū. Silva ir unikala gleznīceibys meistare ar sev rakstureigu i atpazeistamu trīpīni, vīglumu, specifisku dyumoku i precizim akcentim, kū navar saleidzynuot ni ar vīnu nu gleznīceibys prīškguojieju. Kūpumā muokslineicys dorbus raksturoj: harmoneja, leidzsvors, pozitivuo energeja, asketisms.

Publicitatis karteņa