Veronikys Dunduris vuords tim, kas struodoj ar latgalīšu kulturys, volūdys i literaturys vuiceišonu voi apzymuošonu, ir labi zynoms nu latgalīšu kulturviesturis, volūdys i literaturys olimpiadem, vosorys kursim školuotuojim “Vosoruošona” i Metodiskuo centra izveidis Rogovkā. Jei ir vīna nu tim pedagogim, kas paguojušajā godā izapeļnēja žurejis atzineibu i dabova N. Rancāna bolvu – pakovsaktu. Iz nalelu sarunu aicynovu V. Dunduri izreiz piec “Vosoruošonys”, kas itūgod nūtyka 10. reizi Rogovkā. Tys zeimoj, ka latgaliskūs vierteibu kūpšona školuotuojis dzeivē ir miseja i izaicynuojums kai dorba, tai breivajuos dīnuos.

Kai ir izadevs ituo vuiceibu goda laikā “kolpuot” nominacejis pamatidejai?

Turpynovu dareit tuos lītys, kū vysod: organizieju olimpiadi, skotuvis runys konkursu “Vuolyudzāni”, raksteju projektus, organizieju “Vosoruošonu”. Prīks par tū, ka itim pasuokumim izadeve pīsaisteit taidys školys i bārnus, kas dašam par latgaliskū interesejuos moz voi nimoz. Ari Nautrānu vydsškolys komandā, kas olimpiadē beja pyrmuos vītys īgyvieji, īsaisteju školānus, kas varbyut pat nabeja izcyluokūs školānu pulkā. Partū piec olimpiadis jim tai pīauga pošapziņa i lapnums par sovu veikumu! Jā, es ari sajutu gondarejumu.

Kai īrosts gon literaturys, gon volūdys stuņdēs attīceigajūs tematūs stuostu par latgaliskajom aktivitatem. Prūtams, taidā formatā tys vaira kolpoj latvīšu literaruos volūdys prasmu i īmaņu styprynuošonai. Vaira ar bārnim asmu suokuse runuot par gruomotom. Mani tai īdvasmuoja Ingys Ābelis romans par F. Trasunu “Klūgu mūks”, ka napuorstuoju vuiceitīs poša i ar bārnim debatejam par dzeivis vierteibom, procesim sabīdreibā i pasaulē. Nasaverūt ni iz kū, vysod vuicu, ka sabīdreibā vaira ir lobuo.

Kai Jius redzīs, voi taida bolva ir vajadzeiga i cik nūzeimeiga jei ir Jiusu dzeivē?

Latgalīšu Kulturys bīdreiba cīš veiksmeigi īdybuoja itū bolvu. Svareigi, ka tei it tīši Nikodema Rancāna vuordā nūsaukta, partū ka nu juo var vuiceitīs pošaizlīdzeibu, sapratni, dorba mīlesteibu. Tei sapratne, kas jam beja vysuos lītuos, tuos cīši pītryukst myusu dīnuos. Maņ redzīs, ka lauku školuos tū vēļ var panuokt. Tei bolva ir atzineiba školuotuoja dorbam. Školuotuoja dorbu ni padūmu laikā, ni tān tai eisti nanūviertej. Bet tīši nu školuotuoja ir atkareigs, kaida byus nuokamuo paaudze i juos liktiņs.

Bolva roda pacyluoteibu i grybu struoduot. Maņ ir svareigi, ka taidā veidā nūviertej asociacejis dorbu, tei nav viņ muna personiskuo atzineiba.

Var pībiļst, ka V. Dundure ir nūdybynuojuma “Latgalīšu volūdys, literaturys i kulturys viesturis školuotuoju asociacejis” vaļdis prīšksādātuoja, kas itū šaļti aktivi īsasaistejuse nūvodvuiceibys vaicuojumu rysynuošonā, betdasaceit školuotuojus Nikodema Rancāna konkursam var da 5. septembra, nūslāguma pasuokums nūtiks 25. septembrī Ludzys Kulturys nomā. Konkursu organizej Latgalīšu Kulturys bīdreiba sadarbeibā ar Rēzeknis Tehnologeju akademeju, Kulturys ministreju, Rēzeknis, Ludzys, Preiļu, Kuorsovys, Viļānu i Aglyunys nūvoda pošvaļdeibom. Vaira informacejis i konkursa nūlykums

Teksta autore: Ilga Šuplinska, konkursa koordinatore