Myusu dīnu muokslys galerejā Leivuonā (Reigys īlā 108a) nu 13. da 17. septembra nūtiks pyrmais galerejis festivals “URBĀNIE LĪVĀNI”, informej galerejis puorstuove Lāsma Vindule. Festivala laikā nūtiks vysaidys aktivitatis ar mierki pīvērst viereibu industrialuom ākom, pietejūt i izzynojūt tūs viesturi, identificejūt šudiņdīnu i modelejūt nuokūtni.

Leivuons ir unikals ar tū, ka tī nav kaidu piļsātys periferejā asūšu industrialūs rajonu, nu bejušūs ryupneicu ākys atsarūn piļsātys centrā storp dzeivojamuom i sabīdryskuom byuvem. Tuos ir napuortraukti kluotyn asūšys piļsātnīku dzeivē. Sakuortojūt piļsātvidi, vys aktualuoks palīk vaicuojums – kas nūtiks ar itim objektim? Voi postpadūmu montuojumu varam izmontuot kulturys procesu atteisteibā i jaunradis veicynuošonā?

Festivals tiks atkluots ar grupys izstuodi “Industriālisms”. Dorbus izstuodei radejuši: Helen Scott Lidgett Studio Award sajiemiejs Kristaps Ancāns, Juoņs Purcens, Jurs Gribuls, Armands Grundulis, Muorteņš Markots, Ilze Griezāne, Raimonds Vindulis i cyti. Reizē tiks atkluota ari Māra Grunska izstuode “Rēgi”, kas atveidoj pamastys ākys, tymā skaitā bumbu patvertnis, sakaru bunkurus, kūdulrakešu bāzis i ryupneicys Latvejā, rūsynojūt na viņ dūmuot par apsaimnīkuošonys problemom, nu ari ļaunūt saredzēt tūs naparostū skaistumu.

Festivala pyrmuo dīna nūsaslēgs ar sarunu vokoru “URBĀNĀ LAVKA”. Projekts LAVKA ir sarunu pasuokumu cyklys, kas naformalā atmosferā rūsynoj cylvākūs gribiešonu atteisteit sovys zynuošonys, saisteitys ar vysvysaidom dzeivis jūmom.

Festivala ūtrajā dīnā, 14. septembrī, nūtiks ekskursejis bejušajuos Leivuona ryupneicuos, kur varēs dzierdēt ari tūs darbinīku atmiņu stuostus, meistardarbneica bārnim “Nākotnes Līvāni”, lekceja “Pilsētas plānošana. Latvijas un ārvalstu pieredze industriālo teritoriju izmantošanā”, nu dīnys nūslāgumā Myusu dīnu muokslys galerejā nūtiks Ivana Ustinova projekta “OrigiNative” pyrmatskaņuojums.

15. septembrī festivala ītvorūs nūtiks meistardarbneica bārnim “Spēle galerijā” i Kārļa Kazāka koncerts ar stuostejumu par projektu “Velomūzika”, nu 16. septembrī – par kūpā struoduošonys konceptu, daleišonuos ekonomiku i postindustrialū teritoreju atdzeivynuošonu stuosteis Armands Grundulis i Rolands Lakis, kai ari uzastuos kamermuzykys trio nu Jākubpiļs (Smaida Ščerbicka, Agnese Levinska, Ligita Tuntule).

Vysys festivala dīnys režisora i operatora Jākuba Štelmahera vadeibā nūtiks multimedeju meistardarbneica jaunīšim “Industriālie Līvāni”. Tuos dalinīki vuiceisīs filmiešonys pamatpryncypus. Festivala nūslāgumā tiks prezentāts meistardarbneicys dalinīku veiduots audiovizuals stuosts par divejim sūpluok asūšajim pasaulim – industrialū i dzeivuošonai vajadzeigū.

17. septembrī sevkuram interesentam byus vareiba pīsadaleit meistardarbneicā “Industriālais plakāts”, nu festivals nūsaslēgs ar Gata Pastara lekceju/performanci “Skaņas telpa”. Tei stuosteis par skanis kai Vysuma paruodeibys, darbeibys i eksisteņcis pryncypa naizzynuotū byuteibu myusu kasdīnā. Lekceja paradzāta auditorejai bez fizikys voi skaņu inženerejis prīškzynuošonom. Itymā vokorā skaņa paliks radzama.

Festivala pasuokumu apmekliejums – bez moksys. Ar pasuokuma programu var īsapazeit Myusu dīnu muokslys galerejis Facebook lopā.

Projekts teik realizāts ar Latgolys regiona atteisteibys agenturys, Vaļsts kulturkapitala fonda i A/S “Latvijas valsts meži” finansialu atbolstu.