Preiļūs i Preiļu nūvodā nu 15. da 29. septembra nūtiks vairuoki pasuokumi ar i par dzeju. Dzejis dīnu moto tik rūtaleigs – “Dzeja pavedina”, puorvieršūt dzeju materejā, kas pavadynoj iz škeņdeibom, iz atsakluošonu, iz jaunim vaicuojumim, nu rezultatā palīk par impulsu kusteibai, kas ir kai īmeslis uzadrūšynuot, viestej Preiļu nūvoda sātyslopa. 

Dzejis dīnys īsasuoka 1965. godā, kod tyka svieteiti 100 godi latvīšu lelajam dzejnīkam Raiņam. Nu tim laikim dzejis dīnys nūteik kotru godu. Teik atruodeiti goda laikā padareitī dorbi, teik radeiti eipaši puorsteigumi, teik gūdynuoti nūzeimeigī i gaismā calti jaunī.

Preiļu Golvonuo biblioteka (GB) VKKF atbaļsteituo projekta “Gleznojam ar vārdiem…” ītvorūs aicynoj:

• mozūs dzejis skaiteituojus kūpā ar dzymdynuotuojim 15. septembrī 14.30 Preiļu GB Bārnu Literaturys nūdaļā uz sasatikšonu ar dzejneicu, dramaturgi, rakstneicu Ingu Gaili par gruomateņu “Vai otrā grupa mani dzird”;
• 23. septembrī 10.40 Preiļu Vaļsts gimnazejis telpuos i 12.15 Pelieču pamatškolā iz dzejneicys, scenaristis, tekstu autoris i kulturys darbineicys Inetys Atpilis-Juganis sarunom par dzeju ar jaunīšim latgalīšu i latvīšu literarajā volūdā;
• tamā pošā dīnā 10.20 RTRIT (Reigys turisma i rodūšuos industrejis tehnikuma) Preiļu strukturvīneibys telpuos i 12.15 Pelieču pamatškolā sasatikt ar jaunū latgalīšu dzejneicu Anitu Mileiku;
• 29. septembrī Preiļu jaunīšus i puorejūs interesentus iz sarunom par jaunīšu dzeivi caur dzeju ar vīnu nu latvīšu dzejnīku jaunuokuos paaudzis naapstreidamim liderim – dzejnīku, atdzejuotuoju nu vairuoku volūdu, daudzu recenzeju autoru Arvi Viguli.

Dzejis dīnu aktivitatēs īīšona breiva.