Ar Vaļsts kulturkapitala fonda mierkprogramys “Latvijas valsts mežu atbalstītā Latgales kultūras programma 2016” atbolstu 4500 eiro apmārā, Rēzeknis nūvoda pošvaļdeibys leidzfinansiejumu 1700 eiro apmārā, kai ari, pasasokūt Latgolys vargaņu dīnuos savuoktajim zīduojumim i bīdreibys “Sovim ļaudim” i draudzis lūcekļu atbolstu, itūgod turpynojās Nautrānu Vyssvātuokuos Jaunovys Marijis Bezvaineiguos ījimšonys Rūmys katuoļu bazneicys vargaņu restauracejis 2. kuorta, informej bīdreibys puorstuovi.

Latgolys dīvnomi nav boguoti ar senejom i izcylom varganem, vīnys nu taidom ir Nautrānu Vyssvātuokuos Jaunovys Marijis Bezvaineiguos ījimšonys Rūmys katuoļu bazneicys varganis, kuruos pastateitys paguojušuo godu symta 30. godūs i īsvieteitys 1939. goda 10. septembrī, i tuos ir Vaļsts nūzeimis muokslys pīmineklis (Nr.4000). Varganēs ībyuvātys 1542 stabulis, kas sasaglobuojušys gondreiž originalā stuovūklī ar breineigu vargaņtelpys akustiku, nu vargaņu telpa i stabulis laika gaitā nav teireitys, i arī laika zūbs ir aiztics stabulis.

Dorbus vargaņu restauracejā itūgod veic Alvja Melbārža SIA “Ērģeļu darbnīca”. Itūgod beja planavuots veikt leluokū dorba apjūmu vargaņu restauracejā. Oktobrī nūsaslēgs vargaņu II manuaļa stabuļu, pedaļa stabuļu i viejluožu teireišona i atputekļuošona, maituotūs stabuļu restauraceja i metala detaļu atteireišona i konserviešona, kai ari nūtiks instrumenta intūniešonys i skaņuošonys process.

Itūgod vargaņu restauracejis dorbi beja planavuoti tai, kab instrumentu vysmoz varātu spielēt ar napylnu jaudu, izmontojūt tik I manuaļa stabulis.

Paguojušajā godā ar Vaļsts kulturkapitala fonda mierkprogramys “Latvijas valsts mežu atbalstītā Latgales kultūras programma 2015” i Rēzeknis nūvoda pošvaļdeibys leidzfinansiejumu kulturys pīminekļu saglobuošonai tyka nūslāgta restauracejis 1. kuorta. Tamā tyka veikta vargaņu saglobuošona i vīnkuoršuotuo renovaceja – atbylstūša vargaņmotora komplektā ar ventilatoru nūmaiņa, instrumenta gaisa plyusmys sistemys sakuortuošona i izbyuve i maituotūs instrumenta detaļu renovaceja i nūmaiņa. Dorbus veice SIA “Ilsuma ērģeļu restaurācija”, pīsadolūt draudzis lūcekļam Leonam Jerumānam.

Restauracejis 1. kuorta tyka veikta pa pūsmim, partū ka 2015. goda juļa beiguos bazneicā nūtyka koncerts Latgolys vargaņu dīnu ītvorūs ar varganistis Edeitis Alpis i solistis Ilonys Bagelis pīsadaleišonu. Vysi zīduojumi, kas pārņ tyka savuokti Latgolys vargaņu dīnu koncertūs, tyka nūvierzeiti Nautrānu Vyssvātuokuos Jaunovys Marijis Bezvaineiguos ījimšonys Rūmys katuoļu bazneicys vargaņu restauracejis 2. kuortai.

2017. godā planavuota vargaņu restauracejis 3. i nūslādzūšuo kuorta, kai ari vargaņu muzykys koncerts par gūdu Nautrānu Vyssvātuokuos Jaunovys Marijis Bezvaineiguos ījimšonys Rūmys katuoļu draudzis instrumenta renovacejis nūslāgumam.