28. oktobrī Nautrānu vydsškolā, Rogovkā, nūtiks pīredzis apmainis seminars “Nūvoda izzynuošonys īspiejis vuiceibu procesā”, informej seminara koordinatore Veronika Dundure.

Seminarā ar sovu pīredzi pasadaleis Latgolys školu i Rēzeknis Tehnologeju akademejis (RTA) vuiceibspāki. Imants Slišāns stuosteis par latgaliskuos identitatis i latgalīšu volūdys styprynuošonu, sagaidūt Latvejis vaļsts symtgadi. Ilga Šuplinska informēs par RTA ekspediceju materialim kai izzinis i izgleitojūšim leidzeklim nūvodvuiceibā, Veronika Dundure stuosteis par latgalīšu volūdu i nūvodvuiceibu, nu Sandra Ūdre pīduovuos aizdavumu paraugus latgalīšu leksikā i frazeologejā. Inta Ludbuorža nu Baļtinovys stuosteis par nūvoda viesturis izpietis īspiejom, Anita Ludbuorža (Nautrānu vydsškola) par nūvodvuiceibys dorba metodem geografejā, Aelita Andrejeva (Rēzeknis 5. vydsškola) par nūvodvuiceibys nūdarbeibu sagataveišonu i vadeišonu 1.-3. klasei, nu Anna Garanča (Nautrānu vydsškola) – par latgalīšu tautysdzīšmu saglobuošonu i populariziešonu vuiceibu stuņdēs. Aina Rakstiņa (Tiļžys vydsškola) stuosteis par Ontona Slišāna personeibu, Līvija Smirnova (Rykovys pamatškola) – par tolkys tradiceju, Ineta Urtāne – par muzykys terapejis elementu izmontuošonu nūvodvuiceibā.

Seminara nūslāgumā paradzātys debatis.

Seminarā aicynuoti pīsadaleit školuotuoji, školu direktori, Latgolys nūvoda izgleiteibys vadeibys dorba specialisti, pošvaļdeibu deputati, kai ari vysi cyti, kam ryup nūvoda izzynuošona. Daleiba seminarā i debatēs juodasoka seminara koordinatorei Veronikai Dundurei, rokstūt iz e-postu lvlksa@inbox.lv voi zvonūt 26481524. Moksa par pušdīnem 2.50 eiro.

Seminaru organizej Latgalīšu volūdys, literaturys i kulturviesturis školuotuoju asociaceja, Nautrānu vydsškola i Rēzeknis Tehnologeju akademeja. Seminaru finansiali atbolsta Nautrānu vydsškola i Rēzeknis nūvoda pošvaļdeiba.