5. novembrī 21.00 jau catūrtū godu Bolvu nūvoda Kubulu kulturys nomā nūtiks Dzeivuos muzykys festivals “Savējie”, informej pasuokuma organizators Māris Lāpāns.

Festivala byuteiba ir dūt vareibu uzastuot i paruodeit sevi publikys i cytu muziku prīškā jaunajom voi mozzynomajom grupom, kas par pamatu naizmontoj fonogramys aba spielej “dzeivajā”. Vodūtīs piec ituo pryncypa, festivals “Savējie” nav vīna nūteikta muzykys žanra festivals. Tymā ir vareiba dzierdēt muzyku dīzgon lelā amplitudā, suocūt nu popmuzykys da smogom roka intonacejom. Tai kai festivals nūteik Bolvu nūvodā, tod puorsvorā tuos ir tyvuokuos apleicīnis grupys, koč i nikod naizteik ari bez tyvuoku voi tuoluoku gostu.

Itūgod festivalā pīsadola grupa “Melns uz Balta” nu Modyunis, latgaliskuos roka intonacejis īness grupys “Napruots” i “Unknown Artist” nu Viļakys nūvoda, vītejūs muokslinīkus puorstuovēs grupys “Alu Cilvēki”, “Sikspārnis” i pa daļai grupa “Ceļā”, kurymā apsavīnuojuši bejušī bolvuonīši, kas itūšaļt par sovu dzeivisvītu sauc Reigu. Interesantys vāsmis pasuokumā sūla īnest mārgu grupa “Piparmētra” nu Īlyukstis i jaunais flamenko gitarists Rihards Krilovs nu Ruguoju. Eipašī gosti – Latvejā popularuo kantrimuzykys grupa “Apvedceļš” nu Smiļktinis.

Festivals nūtiks iz diveju skotuvu, apmaklātuojus gaida ari vysaidi izklaidejūši puorsteigumi, dorbuosīs kopejneica.

Īīšonys moksa da 22.00 – 4 eiro, vāluok – 5 eiro.