29. oktobrī 16.00 Myusu dīnu muokslys galerejā tiks atkluota Aijis Bley fotoizstuode “Sapņotāji”, kas radeita sadarbeibā ar Leivuona dzeivuotuojim, informej galerejis puorstuove Lāsma Vindule. Izstuode byus apsaverama da 10. decembra.

21. – 23. oktobrī Leivuonā nūtyka Aijis Bley Portretu darbneica “Sapņotāji”, kurymā pīsadaleja 10 leivuonīši. Cylvāki tyka aicynuoti atsaukt “kerminiskajā atmiņā” atbreivuoteibys i snauda stuovūkli. Apstuodynuot iz šaļti laiku. Nūstopēt kasdīnys rutinu. Pīfiksēt i apstuodynuot kaidu sev rakstureigu darbeibu, kusteibu, žestu. Datikt ituo stuovūkļa meditacijā. Fotografa aizdavums ir nūfiksēt itū modeļa i telpys sirreālo sovstarpeigū īdarbeibu.

“Kod cylvāks īsasnauž, juo kermiņs atsabreivoj. Tys izaver tai, it kai tū byutu iz šaļti pamets gors. Tok tys nav mirs kermiņs. Gors nikur nav pagaiss. Atbreivuojs kermini, tys uzluodej i nūsprīgoj telpu ap tū. Veidojūt “snaudūšūs” portretus, gribieju dabuot ituo mīra i reizē uzluodeituos telpys sajiutu,” darbneicu komentej muokslineica.

Izstuodis ekspozicejā byus apsaveramys kartenis nu darbneicys “Sapņotāji” i Aijis Bley seņuok radeitī portreti.

Aija Bley ir kinu režisore i fotografe, kas veiduojuse vaira par 25 video. Muokslineicys personalizstuode “Vēlāk” Latvejis Fotografejis muzejā tyka nomināta Purvīša bolvys pusfinalam 2013. godā. Jei ir beiguse Latvejis Muzykys akademeju svātku režejis specialitatē, Latvejis Kulturys akademeju kinys režejis specialitatē, studej Latvejis Muokslys akademejā vizualū komunikaceju, pīsadalejuse storptautyski atzeituos fotografejis meistarklasēs i ISSP fotoškolā.

Myusu dīnu muokslys galereja atsarūn Reigys īlā 108a, Leivuonā, tuos apmekliejums – bez moksys. Galerejis dorba laiks – nu trešdīnis da sastdīnis 12.00-18:00. Myusu dīnu muokslys galerejis darbeibys vierzīni ir izstuožu darbeiba, naformaluos i tuoluokizgleiteibys jūma i inovativu kulturys pasuokumu organiziešona. Galerejis mierkis ir sekmēt vysaidys muokslys izpausmis regionā i veicynuot tūs daīmameibu vītejim dzeivuotuojim, nūdrosynojūt kvalitativu i inovativu kulturys pasuokumu pīduovuojumu.