Daugovpilī apsaverama izstuode “Stikls bez robežām”
Da 14. novembra Latgolys Centraluos bibliotekys (LCB) periodikys laseitovā (Daugovpilī, Reigys īlā 22a, 2. stuovā) ir apsaverama izstuode “Stikls bez robežām”, informej bibliotekys puorstuove Inga Gedžūne. Ekspozicejis autori: Inga Salmiņa (laidynuots styklys), Juoņs Ziemelis (kūkgrīzumi) i Muorteņš Markots (metals). Sasatikšona ar autorim paradzāta 14. novembrī 16.00 LCB periodikys laseitovā izstuodis nūslāguma pasuokumā.
Izstuode radeita, kab ļautu lobuok īpazeit styklu, kas ir cīši interesants, daudzveideigs i sovā ziņā ari nūslāpumains materials. Dorbi veiduoti, savīnojūt i sovstarpeigi papyldynojūt styklu ar kūku, metalu i gaismu, vaicojūt jaunus rysynuojumus, naapsarūbežojūt tik ar vīnu stykla tehniku i attaisūt ceļu iz styklu bez rūbežu. Ekspozicejā apsaverami ari daži unikali, jauna tipa muokslys dorbi – gaismys objekti, kurūs styklys īsamirdz nu jauna i kūks atsadzeivoj vēļ nabejušā veidā. Īspaidi, šaļtenis, kruosys, tāli, nūskanis… – īlaidynuoti styklā… īdzeivynuoti kūkā…
Izstuodē apsaveramī stykli radeiti Leivuonā, Stykla laidynuošonys darbneicā “Stikls no Līvāniem”. Darbneicā teik struoduots vairuokuos stykla laidynuošonys tehnikuos, īlaidynojūt styklā puorsteidzūšus zeimiejumus i izmontojūt na kruosys, nu vysaidys strukturys stykla materialus. Darbneica pīduovoj na tik vareibu vērtīs stykla meistaru dorbu, nu ari pošim dorbuotīs ar styklu. Da poša novembra beigu “Stikls no Līvāniem” pīduovoj attaiseitys radūšuos darbneicys, kurūs laikā i atseviški interesenti, i saimis, klasis i dorba kolektivi var gatavēt Zīmyssvātku rūtuojumus ituo gods lelajai eglei Latgolys muokslys i amatnīceibys centrā. Vaira informacejis i dasasaceišona pi stykla meistaris Ingys Salminis (t. 29388137).
14. novembrī 16.00 LCB periodikys laseitovā tiks aizvadeits izstuodis “Stikls bez robežām” nūslāguma pasuokums, kuruo laikā interesentim byus vareiba sasatikt ar izstuodis autorim i izzynuot vaira par Leivuona stykla laidynuošonys darbneicys dorbu.
Izstuodi reikoj radūšuo apvīneiba “Perspektīva” sadarbeibā ar Latgolys muokslys i amatnīceibys centru ar Vaļsts kulturkapitala fonda i Latgolys Regiona atteisteibys agenturys atbolstu.
